FLASH
Shkruar nga Pamfleti
Hetimet lidhen me një udhëtim të ekipit në Zelandën e Re në muajin mars – FIFA deklaron se i trajton "jashtëzakonisht seriozisht" të gjitha akuzat për sjellje të papërshtatshme
Kapiteni i përfaqësueses së Kepit të Gjelbër, Ryan Mendes, është përballur me akuza për përdhunim nga një përkthyese e ekipit gjatë një udhëtimi në Zelandën e Re në muajin mars, sipas raportimeve të agjencisë braziliane Globo.
Sipas denoncimit, 36-vjeçari, i cili ka luajtur në të gjitha ndeshjet e përfaqësueses së Kepit të Gjelbër në Kupën e Botës, dyshohet se ka sulmuar seksualisht një shtetase braziliane të angazhuar si përkthyese gjatë turneut të ekipit në Zelandën e Re.
Gruaja, identiteti i së cilës nuk është bërë publik, deklaron se fillimisht iu drejtua të paktën tre zyrtarëve të federatës së futbollit të Kepit të Gjelbër, por pretendon se nuk mori asnjë përgjigje.
Çështja po hetohet nga Policia e Zelandës së Re, e cila ka siguruar pamje nga kamerat e sigurisë së hotelit në Auckland dhe pret rezultatet e ekspertizës kriminalistike përpara se të vendosë nëse do të ngrejë akuza penale ndaj Mendes.
Rasti ishte raportuar muajin e kaluar nga mediat e Zelandës së Re, pa u bërë publik identiteti i futbollistit. Raportohej vetëm se ai ishte pjesë e përfaqësueses së Kepit të Gjelbër.
Në dëshminë e saj, gruaja shprehet se ishte punësuar nga federata e futbollit të Kepit të Gjelbër për ndeshjet e zhvilluara në kuadër të serisë së FIFA-s në Zelandën e Re. Pas ndeshjes së parë kundër Kilit, ajo thotë se u ftua në një takim në një nga dhomat e hotelit ku qëndronte ekipi kombëtar.
Sipas saj, pasi kuptoi se prania e saj nuk ishte e nevojshme për përkthim dhe se bëhej fjalë për një takim shoqëror, u kthye në dhomën e saj. Pak më vonë, dëgjoi trokitje në derë.
Ajo pretendon se, sapo hapi derën, Ryan Mendes hyri me forcë në dhomë, e sulmoi fizikisht duke e kapur nga fyti, e goditi dhe e kafshoi, përpara se ta përdhunonte. Këto pretendime janë pjesë e deklaratës së saj dhënë Policisë së Zelandës së Re.
Sipas raportimeve, ajo u ka dorëzuar autoriteteve fotografi që tregojnë lëndime në gojë, qafë, këmbë dhe brinjë.
Deri më tani, Ryan Mendes nuk ka reaguar publikisht ndaj akuzave.
FIFA publikoi një deklaratë disa orë pasi akuzat u bënë publike. Organizata njoftoi se është në kontakt me autoritetet e Zelandës së Re dhe se i trajton "jashtëzakonisht seriozisht" të gjitha akuzat për sjellje të papërshtatshme.
Megjithatë, FIFA theksoi se nuk mund të komentojë mbi rastin konkret dhe as të konfirmojë nëse janë duke u zhvilluar hetime.
Lini një Përgjigje