FLASH
Shkruar nga Pamfleti
Presidenti Lee Jae Myung kërkon hetim dhe reforma në futbollin korean, ndërsa trajneri Hong Myung-bo largohet pas dështimit në fazën e grupeve…
Trajneri i përfaqësueses së Koresë së Jugut, Hong Myung-bo, ka njoftuar dorëheqjen pas eliminimit të ekipit në fazën e grupeve të Kupës së Botës. Largimi i tij vjen edhe pas kritikave publike të presidentit të vendit, Lee Jae Myung.
Në një reagim të publikuar në platformën X, presidenti Lee vuri në pikëpyetje mënyrën se si ishte emëruar Hong në krye të kombëtares. Sipas tij, përzgjedhja nuk u bazua te kompetenca profesionale.
"Edhe një herë u dëshmua se zgjedhja e njerëzve të duhur është vendimtare. Kur drejtues të paaftë emërohen për shkak të besnikërisë dhe jo aftësive, një rezultat i tillë është plotësisht i parashikueshëm", deklaroi Lee.
Duke komentuar eliminimin e hershëm të Koresë së Jugut, presidenti shtoi se ishte "plotësisht i tronditur" nga rezultati dhe paralajmëroi reforma të thella në administrimin e futbollit për të shmangur përsëritjen e një dështimi të tillë.
Lee i kërkoi Ministrisë së Kulturës, Sportit dhe Turizmit të hetojë në detaje rrethanat e eliminimit, të analizojë shkaqet dhe të hartojë masa konkrete për përmirësimin e sistemit. Ai theksoi se pjesëmarrja në Kupën e Botës financohet edhe me fonde publike dhe se institucionet kanë përgjegjësi për rezultatet.
Hong Myung-bo është një nga figurat më të njohura të futbollit korean. Si kapiten, ai udhëhoqi Korenë e Jugut drejt vendit të katërt në Kupën e Botës 2002, turne që u zhvillua në vendin e tij dhe në Japoni. Ai kishte drejtuar kombëtaren edhe në Botërorin e vitit 2014, ku skuadra u eliminua po në fazën e grupeve, duke e mbyllur grupin pas Belgjikës, Algjerisë dhe Rusisë.
Hong u rikthye në stolin e Koresë së Jugut në korrik 2024, duke pasuar gjermanin Jürgen Klinsmann.
Lini një Përgjigje