FLASH
Shkruar nga Pamfleti
Roma luan tenis dhe shfryn ndaj Empolit të gjithë zhgënjimin pas 3 javëve të para të Serisë A.Verdhekuqtë kanë poshtuar Empolin 7-0 në “Olimpico”. Një natë horror për Etrit Berishën që në dy ndeshjet e fundit ka pësuar 9 gola .
Ekipi i drejtuar nga Zhoze Murinjo fitoi penallti pas vetëm disa sekondash lojë, pasi Sebastian Ualukievic preku topin me dorë. Nga pika e bardhë nuk gaboi Dibala, me portierin Etrit Berisha që i kuptoi krahun, por nuk mundi dot të neutralizonte topin. Goli i dytë i skuadrës kryeqytetase dhe goli i parë me fanelën e Romës për Renato Sançez erdhi në minutën e 8. Mysafirët ishin të pafat në minutën e 35, ku një autogol i Grasit thelloi edhe më shumë diferencat.
Në pjesën e dytë ishte sërish Dibala që ndezi dritën e spektaklit, teksa u fut në zonë, dribloi mbrojtësin lehtësisht dhe mposhti Berishën, duke realizuar golin e dytë në Serinë A në 2 ndeshje te luajtura.
Sa i takon lojtarëve shqiptarë, përveç Berishës që ishte titullar në mesin e shtyllave, në pjesën e dytë tek Empoli u aktivizua edhe mbrojtësi Ardian Ismajli, i cili mori vendin e polakut Ualukievic. Spektakli i golave nuk kishte përfunduar ende, Cristante “tundi rrjetën” në minutën e 80-të, sakaq Romelu Lukaku “e bëri sefte” te Roma duke dërguar shifrat në 6-0. I shtati gol mban firmën e Mancinit.
Roma merr fitoren e parë në kampionat dhe tashmë fokusi është te ndeshja e radhës, ajo ndaj Torinos në Torino. Empoli duhet të fillojë përgatitjet sa më shpejt të jetë e mundur për një takim tjetër të vështirë, atë ndaj Interit në shtëpi.
Lini një Përgjigje