FLASH
Shkruar nga Pamfleti
Autoritetet ligjzbatuese në Greqi kanë arrestuar shefin e rojeve të një burgu, ku dy ditë më parë u ekzekutua një i dënuar me burgim të përjetshëm.
Antonis Papadatos u ekzekutua në qeli nga një bullgar, i cili vuante dënimin në burgun e Domokos.
Papadatos, sipas mediave greke, u qëllua me armë zjarri në sy të shqiptarit Alket Rizai, por jo vetëm. Kamerat e sigurisë zbuluan se në momentin kur u qëllua Papadatos në vendin e ngjarjes ishte edhe shefi i rojeve të burgut. Viktima u qëllua me një plumb në kokë, duke i shkaktuar vdekjen e menjëhershme.
Pamjet filmike inkriminojnë autorin e krimit dhe ndryshojnë rrjedhën e ngjarjes, pasi shefi i rojeve akuzohet tashmë se ka bashkëpunuar në vrasjen e Papadatos.
Hetimi për vrasje vazhdon, ndërsa bullgari i akuzuar si ekzekutor tha se kishte vepruar në vetëmbrojtje.
Autoritetet greke po hetojnë se si arma ka hyrë në burg, kush e futi atë dhe si iu çua në qeli autorit të dyshuar të vrasjes së Papadatosit.
Hetuesit grekë dyshojnë se vrasja e Papadatos ishte përmbushja e një “kontrate vdekjeje”, pra një krim i kryer me porosi.
Referuar pamjeve të kamerave të sigurisë, autoritetet kanë zbuluar se vrasja ishte e paramenduar. Sipas mediave greke, bullgari e ka thirrur viktimën me pretendimin se po e kërkon shefi i rojeve të burgut dhe më pas ka qëlluar mbi të.
Lini një Përgjigje