FLASH
Shkruar nga Pamfleti
Një 45-vjeçar shqiptar, i shpallur në kërkim ndërkombëtar prej katër vitesh nga autoritetet italiane, është arrestuar në Tiranë gjatë një operacioni të koduar “Të kërkuarit”, të zhvilluar nga Policia e Shtetit në bashkëpunim me Interpolin.
Sipas mediave italiane, ai kishte një kartelë të gjatë penale dhe konsiderohej një nga figurat kryesore të rrjetit të trafikut të drogës që furnizonte qytetin e Venecias me kokainë. Autoritetet dyshohet se e lokalizuan pas kthimit të tij nga Dubai në Shqipëri.
Gazeta italiane “Corriere” raportoi se hetuesit arritën të zbulonin vendndodhjen e 45-vjeçarit duke monitoruar lëvizjet e familjarëve të tij. Hetimi u zhvillua nga një grup pune i përbërë nga hetues të Skuadrës Fluturuese të Venecias dhe Shërbimit Qendror të Operacioneve (SCO), nën koordinimin e Prokurorisë së Venecias.
Sipas medias italiane, hetimet zbuluan se i shumëkërkuari jetonte në Dubai, por ishte rikthyer së fundmi në Shqipëri, çka çoi më pas në operacionin për arrestimin e tij në Tiranë.
45-vjeçari, i cili gjatë periudhës së aktivitetit kriminal jetonte në Mestre, ishte dënuar përfundimisht për konspiracion në trafikimin dhe shpërndarjen e lëndëve narkotike.
Hetimet italiane pretendojnë se, gjatë viteve 2019–2021, ai kishte një rol drejtues në organizatën kriminale që kontrollonte furnizimin me kokainë në qendrat e trafikut të drogës në Venecia. Sipas autoriteteve, ai menaxhonte kanalet e furnizimit dhe organizonte shpërndarjen e drogës në zonën e lagunës.
I arratisur që prej vitit 2022, shqiptari ishte subjekt i një “njoftimi të kuq” të Interpolit, të lëshuar nga Sekretariati i Përgjithshëm në Lyon.
Arrestimi i tij është pjesë e projektit “Kërkohet”, një operacion i koordinuar nga SCO për identifikimin dhe kapjen e personave të arratisur me profil të lartë brenda dhe jashtë Italisë.
Deri tani, Policia e Shtetit nuk ka dhënë detaje zyrtare mbi operacionin dhe procedurat që do të ndiqen për ekstradimin e mundshëm të të arrestuarit drejt Italisë.
Lini një Përgjigje