FLASH
Shkruar nga Pamfleti
Një operacion i Policisë së Tiranës kundër aktivitetit të paligjshëm të këmbimit valutor ka çuar në sekuestrimin e mijëra eurove, dollarëve, paundëve dhe lekëve në tre subjekte në kryeqytet.
Sipas Policisë, gjatë kontrolleve të zhvilluara në tre subjekte në Tiranë, u konstatua se aty ushtrohej aktivitet i këmbimit valutor pa licencën përkatëse. Subjektet ku u evidentuan shkeljet ndodheshin në rrugët “Abdyl Frashëri”, “Sokrat Miho” dhe “Sulejman Delvina”.
Gjatë operacionit u sekuestruan 45 mijë euro, 7 mijë dollarë, 3 mijë paund dhe 1.5 milion lekë. Për këtë rast kanë nisur hetimet ndaj pronarëve të tre subjekteve.
“Policia e Tiranës/Vijon zbatimi i planit të posaçëm të masave për goditjen e rasteve të ushtrimit të aktiviteteve ekonomike, në kundërshtim me ligjin. Konstatohet se ne 3 subjekte kryhej këmbim valutor, pa licencë. Dje, Policia e Tiranës, në zbatim të këtij plani, goditi dhe 2 raste në këtë fushë. Vihen në hetim 3 pronarët e subjekteve. Sekuestrohen 45 000 euro, 7000 dollarë, 3000 paunde dhe 1 500 000 lekë. Specialistët e Seksionit për Hetimin e Pastrimit të Parave dhe Aseteve Kriminale, në vijim të kontrolleve të kryera në zbatim të planit të posaçëm të masave “Për goditjen e aktiviteteve të paligjshme”, evidentuan 3 raste të tjera të këmbimit të valutave, nga subjekte të palicencuara për këtë aktivitet. Për këto raste u referuan materialet në Prokurori, ku nisi procedimi penal për 3 pronarët e subjekteve në rrugët “Abdyl Frasheri”, “Sokrat Miho” dhe “Sulejman Delvina”, shtetasit O. L., 31 vjeç, E. P., 35 vjeçe dhe M. D., 40 vjeç. Kontrollet dhe verifikimet ndaj shtetasve dhe në subjekte, vijojnë. Materialet procedurale iu referuan Prokurorisë së Tiranës, për veprime të mëtejshme", njofton policia.
Lini një Përgjigje