FLASH
Shkruar nga Pamfleti
Spanja ka regjistruar numrin më të lartë të viktimave të shkaktuara nga temperaturat e larta për muajin maj që prej vitit 2015.
Sipas Ministrisë së Shëndetësisë, të paktën 101 persona humbën jetën gjatë muajit të kaluar si pasojë e valës së të nxehtit, një shifër që përbën një rekord për këtë periudhë.
“Ky numër është 3.6 herë më i lartë se mesatarja e vdekjeve të lidhura me nxehtësinë, e regjistruar gjatë muajit maj në dekadën e fundit”, bëri të ditur ministria.
Ndërkohë, temperatura rekord për muajin maj janë regjistruar në disa qytete spanjolle gjatë ditëve të fundit, veçanërisht në pjesën veriore të vendit. Agjencia Kombëtare Meteorologjike (Aemet) i ka cilësuar temperaturat si “jashtëzakonisht të larta për muajin maj” dhe ka vënë në dukje se kjo valë e të nxehtit ka vazhduar për disa ditë me radhë.
Sipas meteorologëve, qëndrueshmëria dhe intensiteti i temperaturave të larta kanë ndikuar ndjeshëm në rritjen e rasteve fatale të lidhura me motin ekstrem.
Ministrja spanjolle e Shëndetësisë, Mónica García, tha se rreziku nuk lidhet vetëm me rritjen e temperaturave, por edhe me faktin që valët e të nxehtit po shfaqen më herët se zakonisht.
“Problemi nuk është më vetëm që është më nxehtë, por që nxehtësia po vjen gjithnjë e më herët dhe trupat tanë nuk janë ende të përshtatur”, u shpreh ajo gjatë prezantimit të Planit Kombëtar 2026 për Parandalimin e Efekteve Shëndetësore të Temperaturave Ekstreme.
Sipas Ministrisë së Shëndetësisë, rreziku i vdekshmërisë rritet nga 9.1% deri në 10.7% për çdo gradë që temperatura kalon kufirin e konsideruar të rrezikshëm për shëndetin.
Të dhënat afatgjata tregojnë gjithashtu ndikimin e rëndë të nxehtësisë në Spanjë. Nga viti 2015 deri në vitin 2025, sistemi MoMo vlerëson se 27.564 persona kanë humbur jetën si pasojë e temperaturave të larta. Viti më vdekjeprurës mbetet 2022 me 4.789 viktima, ndërsa 2025 renditet i dyti me 3.832 vdekje.
Lini një Përgjigje