FLASH
Shkruar nga Pamfleti
Presioni publik për zgjedhje të parakohshme është intensifikuar që nga nëntori i vitit 2024, kur një shembje fatale e soletës në stacionin hekurudhor të Novi Sadit vrau 16 persona
Serbia me shumë gjasë po shkon drejt zgjedhjeve të parakohshme parlamentare, thanë burime politike për të përditshmen lokale Danas, ndërsa 28 dhjetori konsiderohet si data më e mundshme, pavarësisht se opsione të tjera në tetor dhe janar janë ende duke u marrë në konsideratë.
Votimi do të zhvillohet shumë përpara zgjedhjeve të rregullta parlamentare të vitit 2027 dhe vjen pas muajsh presioni politik në rritje të shkaktuar pas aksidentit të ndodhur në Novi Sad ku u shemb një infrastrukturë në një prej stacioneve të rikonstruktuara.
Presidenti Aleksandar Vuçiç konfirmoi më 8 gusht se zgjedhjet do të mbaheshin para afatit ligjor, por nuk pranoi të jepte një datë specifike. “Ne me siguri do të kemi zgjedhje para afatit kushtetues dhe ligjor”, tha Vuçiç në një konferencë për shtyp në përgjigje të një pyetjeje nga N1 .
Burime politike i thanë gazetës Danas se udhëheqja e Partisë Progresive Serbe (SNS) në pushtet po anon drejt një votimi më 28 dhjetor. Ky veprim vjen mes protestave të vazhdueshme mbarëkombëtare, të cilat kanë sfiduar legjitimitetin e qeverisë për çështje që lidhen me korrupsionin dhe sigurinë publike.
Sipas një sondazhi të Ipsos të publikuar më 30 korrik nga gazeta lokale Blic , SNS vazhdon të gëzojë mbështetje të fortë, me 46.6% të votuesve të vendosur që e mbështesin partinë. Megjithatë, sondazhi nuk mori në konsideratë koalicionet e mundshme të opozitës apo "listën e studentëve" që sapo ka filluar, një aleancë që përfshin studentë, akademikë, fermerë dhe grupe punëtorësh.
Një sondazh i veçantë nga Sprint Insight, i siguruar nga bne IntelliNews muajin e kaluar, paraqiti një pamje më konkurruese. Ky sondazh tregoi se lista e studentëve kryesonte me 54.8% mbështetje, përpara një koalicioni të udhëhequr nga SNS në pushtet, Partia Socialiste (SPS) dhe Zavetnici i krahut të djathtë me 42.1%.
Vuçiç pranoi popullaritetin e listës së studentëve në konferencën për shtyp, duke cituar sondazhet e fundit. “Ata janë favoritë të mëdhenj, ua pranoj këtë”, tha ai, duke shtuar “por ata nuk mund të më heqin të drejtën për të luftuar me njerëz me të njëjtat mendime që nuk duan ta shndërrojnë Serbinë në një stallë derrash.”
Presioni publik për zgjedhje të parakohshme është intensifikuar që nga nëntori i vitit 2024, kur një shembje fatale e çatisë në stacionin hekurudhor të Novi Sadit vrau 16 persona dhe shkaktoi protesta të gjera. Kjo u pasua me akuza për neglizhencë dhe keqmenaxhim të qeverisë, të cilat çuan përfundimisht në dorëheqjen e kryeministrit Milos Vuçeviç në janar.
Edhe pse qeveria u përpoq të stabilizonte situatën përmes një riorganizimi kozmetik të kabinetit dhe arrestimit të disa zyrtarëve nën akuzat për korrupsion, protestat kanë vazhduar, me tensione që janë përshkallëzuar në përleshje të dhunshme me policinë në muajt e fundit.
Ndërsa SNS-ja ruajti kontrollin në zgjedhjet lokale në fillim të këtij viti dhe opozita parlamentare mbetet e fragmentuar, peizazhi zgjedhor është bërë më i paqëndrueshëm me shfaqjen e listës së studentëve të pavarur.
Nëse konfirmohen, votimi i 28 dhjetorit do të jetë i dyti zgjedhje të parakohshme parlamentare në Serbi në më pak se pesë vjet.
Lini një Përgjigje