FLASH
Shkruar nga Pamfleti
Tensionet në Lindjen e Mesme po përshkallëzohen sërish, ndërsa përplasjet mes Iranit, Shteteve të Bashkuara dhe aktorëve të tjerë rajonalë rrezikojnë të zgjerojnë konfliktin në korridore strategjike për tregtinë ndërkombëtare.
Në këtë situatë të brishtë, vëmendja është përqendruar te ngushtica e Bab al-Mandab, një nga rrugët më të rëndësishme detare në botë, ku çdo kërcënim për bllokim mund të ketë pasoja të mëdha për ekonominë globale.
Bab al-Mandab, e njohur edhe si “Porta e Lotëve”, lidh Detin e Kuq me Detin Arabik dhe konsiderohet një pikë kyçe për transportin ndërkombëtar të mallrave dhe energjisë. Emri i saj lidhet me kushtet e vështira të lundrimit dhe rëndësinë strategjike që ka fituar ndër shekuj.
Zona ndikohet drejtpërdrejt nga aktiviteti i rebelëve Houthi në Jemen, grup i mbështetur nga Teherani dhe i pajisur me raketa me rreze të gjatë veprimi. Gjatë muajve të fundit, Houthit kanë sulmuar dhjetëra anije që kalonin nëpër Detin e Kuq, duke deklaruar se veprimet e tyre janë përgjigje ndaj operacioneve ushtarake izraelite në Rripin e Gazës.
Ndërkohë, Bashkimi Evropian i ka bërë thirrje Izraelit të ndalojë përshkallëzimin ushtarak në Liban dhe të respektojë sovranitetin dhe integritetin territorial të vendit, duke nënvizuar nevojën për vazhdimin e përpjekjeve diplomatike që synojnë stabilitetin rajonal.
Nga ana tjetër, Hezbollah ka paralajmëruar se nuk do të ndalë sulmet ndaj veriut të Izraelit. Një burim pranë organizatës ka deklaruar se grupi nuk po shqyrton ndërprerjen e operacioneve, për sa kohë që bombardimet izraelite në Liban vazhdojnë.
Situata u tensionua më tej pas raportimeve se një spital në qytetin e Tiros, në jug të Libanit, pësoi dëme të mëdha dhe pati të plagosur si pasojë e një sulmi izraelit. Lajmi u konfirmua nga agjencia kombëtare e lajmeve e Libanit dhe Ministria e Shëndetësisë e vendit.
Më herët, ushtria izraelite kishte lëshuar urdhra evakuimi për disa lagje në jug të Bejrutit, duke sinjalizuar mundësinë e operacioneve të reja ushtarake.
Me konfliktet që po zgjerohen në disa fronte njëkohësisht, analistët paralajmërojnë se çdo përshkallëzim në zonën e Bab al-Mandab mund të ndikojë drejtpërdrejt në qarkullimin e mallrave, furnizimin me energji dhe stabilitetin ekonomik global.
Lini një Përgjigje