FLASH
Shkruar nga Pamfleti
Vala e fundit e sulmeve ajrore izraelite në jug të Libanit po konsiderohet si një përshkallëzim i rrezikshëm i situatës, duke vënë në pikëpyetje vlefshmërinë e armëpushimit mes Izraelit dhe Libanit.
Sipas raportimeve nga Bejruti, bombardimet intensive kanë goditur zona të shumta në jug të vendit, ndërsa deri në 300 qytete dhe fshatra në jug të lumit Zahrani kanë marrë urdhra evakuimi nga autoritetet izraelite.
Kjo situatë ka shkaktuar një largim masiv të civilëve, të cilët po braktisin shtëpitë nga frika e sulmeve të reja. Banorëve u është kërkuar të largohen menjëherë nga zonat e shpallura si “zona luftimi”, me paralajmërimin se rrezikojnë jetën nëse qëndrojnë aty.
Megjithëse më 17 prill u njoftua një zgjatje 45-ditore e armëpushimit mes dy vendeve, zhvillimet në terren tregojnë një realitet krejt ndryshe. Sulmet dhe bombardimet vijojnë pothuajse çdo ditë, kryesisht në jug të Libanit.
Sipas raportimeve, trupat izraelite po operojnë në dhjetëra qytete dhe fshatra në zonën jugore, ndërsa objektivi strategjik i Izraelit për dobësimin dhe shkatërrimin e Hezbollahut duket se nuk është arritur plotësisht.
Situata mbetet tepër e tensionuar dhe frika për një konflikt më të gjerë në rajon po shtohet nga ora në orë.
Lini një Përgjigje