FLASH
Shkruar nga Pamfleti
Tensionet në Gjirin Persik janë shtuar sërish pasi marina iraniane ndaloi katër anije në Ngushticën e Hormuzit, të cilat po tentonin të hynin në rajon pa u koordinuar me autoritetet iraniane.
Sipas agjencisë iraniane të lajmeve Tasnim, forcat detare iraniane u dhanë fillimisht paralajmërime anijeve, por ekuipazhet nuk respektuan udhëzimet e dhëna nga Teherani.
Një burim ushtarak, i cituar nga mediat iraniane, deklaroi se pas mosbindjes ndaj urdhrave, marina iraniane hapi zjarr me të shtëna paralajmëruese. Pas incidentit, anijet ndryshuan drejtim dhe u larguan nga zona.
Deri më tani nuk janë publikuar informacione mbi identitetin e anijeve apo shtetet nën flamurin e të cilave lundronin.
Incidenti ndodh në një periudhë të ndjeshme për rajonin, ndërsa SHBA dhe Irani po vijojnë negociatat për një marrëveshje të mundshme që synon uljen e tensioneve mes dy vendeve.
Në të njëjtën kohë, Departamenti amerikan i Thesarit njoftoi sanksione të reja ndaj Iranit. Uashingtoni përfshiu në listën e zezë të Shtetasve të Caktuar Posaçërisht një strukturë të krijuar së fundmi nga Teherani, të quajtur “Persian Gulf Strait Authority”.
Institucioni në fjalë është ngritur për të administruar kërkesat e anijeve që kalojnë nëpër Ngushticën e Hormuzit, një nga rrugët detare më strategjike në botë për transportin e naftës dhe gazit natyror.
Lini një Përgjigje