FLASH
Shkruar nga Pamfleti
Dy zyrtarë të lartë japin dorëheqjen, ndërsa rritet presioni për largimin e një ministreje
Dy figura të larta në Ministrinë e Drejtësisë të Italisë, të cilat janë nën hetim penal, dhanë dorëheqjen të martën, ndërsa kryeministrja Giorgia Meloni po ushtron presion që edhe një ministre e kabinetit të largohet nga detyra.
Meloni po riformaton qeverinë e saj pas një humbjeje të rëndë në referendumin e së hënës, që ka dobësuar autoritetin e saj dhe ka inkurajuar opozitën.
Votuesit hodhën poshtë bindshëm reformën kryesore të Melonit në drejtësi, në një votim me peshë të madhe që u konsiderua gjerësisht si test për lidershipin e saj, duke e kthyer atë që qeveria e kishte paraqitur si një rishikim teknik në një refuzim më të gjerë politik.
Rezultati ka tronditur qeverinë dhe ka shkaktuar pasoja të menjëhershme politike. Opozita e akuzoi Melonin se po gjen “koka turku” për gabimet e saj.
Të tre këta zyrtarë janë objekt hetimesh nga prokurorët, duke krijuar një imazh të dëmshëm për një qeveri që ka synuar të kufizojë rolin e gjyqësorit. Kritikët argumentojnë se qëllimi i vërtetë i referendumit të dështuar ishte mbrojtja e politikanëve nga hetimet.
Nënsekretari i Drejtësisë, Andrea Delmastro Delle Vedove, një aleat i kahershëm i Melonit, u lidh javën e kaluar me një klan mafioz në Romë pasi u zbulua se kishte investuar në një restorant bifteku bashkë me vajzën e një përfaqësuesi të dënuar të mafias.
Delmastro Delle Vedove mohoi çdo shkelje dhe tha se e kishte korrigjuar gabimin “sapo e kuptoi”, por pranoi se “duhej të kishte qenë më i kujdesshëm”.
“Unë gjithmonë kam luftuar krimin dhe kam arritur rezultate konkrete dhe të rëndësishme… Por marr përgjegjësinë [për gabimin] në interes të vendit dhe, mbi të gjitha, për shkak të respektit që kam për qeverinë dhe kryeministren,” tha ai në një deklaratë të publikuar të martën për të njoftuar dorëheqjen.
Delmastro Delle Vedove kishte marrë gjithashtu një dënim penal më herët gjatë kësaj legjislature pasi kishte nxjerrë sekrete zyrtare.
Shefja e kabinetit në Ministrinë e Drejtësisë dhe ish-deputetja Giusi Bartolozzi përballet me akuza penale lidhur me një mbulim të dyshuar të një rasti që përfshin një komandant lufte libian, i cili u arrestua vitin e kaluar me një urdhër të Gjykatës Penale Ndërkombëtare dhe më pas u largua me avion nga Roma. Gjatë fushatës ajo i quajti prokurorët “skuadër ekzekutimi”, duke përforcuar akuzat se qeveria i sheh hetimet si ndërhyrje politike. Bartolozzi nuk iu përgjigj menjëherë kërkesës për koment.
Meloni sinjalizoi gjithashtu se kishte humbur besimin te ministrja e Turizmit, Daniela Santanchè, e cila është urdhëruar të dalë në gjyq për akuza të lidhura me mashtrim ndaj ndihmave të Covid-19, dhe tha në një deklaratë se “shpresonte” që ajo të zgjidhte të jepte dorëheqjen. Santanchè nuk iu përgjigj menjëherë kërkesës për koment.
Ministri i Drejtësisë, Carlo Nordio, i cili hartoi reformën, mori përgjegjësinë për humbjen, por tha të martën se nuk do të japë dorëheqjen dhe se do të “kthehet te studimet dhe hobet e tij” pas zgjedhjeve kombëtare që pritet të mbahen vitin e ardhshëm.
Kryetarja e Partisë Demokratike, Elly Schlein, deklaroi për televizionin La7 se ata që dhanë dorëheqjen ishin “koka turku të lehta për një humbje që është tërësisht e Giorgia Melonit”.
Carlo Calenda, lideri i partisë centriste Azione, tha se dorëheqjet ishin “të nevojshme, të përshtatshme dhe të vonuara”.
Senatorja Raffaella Paita nga partia centriste Italia Viva i quajti dorëheqjet “një tërmet politik në qeveri” dhe i kërkoi Melonit të japë shpjegime në parlament. “Kryeministrja nuk mund të ketë gjysmën e qeverisë që jep dorëheqjen për të shmangur dorëheqjen e saj.” /Përshtatur nga Politico/
Lini një Përgjigje