FLASH
Shkruar nga Pamfleti
GJKKO vendosi të rikthejë për hetim në SPAK çështjen që lidhet me Irena Gjokën, ish-drejtuesen e Gjykatës Speciale.
Gjoka dyshohet se nuk ka deklaruar në formularin e dekriminalizimit një dënim penal dhënë nga autoritetet greke për përdorimin e një vize të falsifikuar.
Nëse kjo provohet nga autoritetet shqiptare, Gjoka rrezikon jo vetëm ndërprerjen e karrierës në sistemit e drejtësisë, por mund të përballet edhe me një dënim penal.
SPAK kërkoi mbylljen e çështjes në GJKKO, por kjo e fundit ka urdhëruar Prokurorinë Speciale që të vijojë hetimet, madje duke i përcaktuar edhe detyrat që duhet të përmbushen brenda 6 muajve.
Gjyqtarja e GJKKO-së, Marinela Osmani, vendosi të kthejë dosjen në SPAK për plotësim hetimesh duke i caktuar 20 detyra hetimore që SPAK nuk i kishte kryer ndaj dosjes së Irena Gjoka.
Avokati Genc Gjokutaj, i cili mbron edhe ish-Kryeministrin Sali Berisha, duke komentuar vendimin e GJKKO-së tha se ai rivendos çështjen në shina dhe është një përgjigje ligjore që zbulon shumë anë të hetimit të kësaj çështjeje.
“GJKKO vendosi SPAK-un para përgjegjësisë për të hetuar këtë çështje, një nga çështjet më të rëndësishme sa i takon jo vetëm hetimit, cilësisë së tij por dhe integritetit të GJKKO-së”, tha Gjokutaj.
Irena Gjoka është kallëzuar nga Adriana Kalaja për fshehje të dënimit në formularin e dekriminalizimit. Në vitin 2005, ajo u ndalua në kufi me dokumente të parregullta dhe u dënua në Greqi me 3 muaj burg, të konvertuar në gjobë prej 1500 euro.
SPAK kërkoi pushimin e çështjes duke pranuar se Irena Gjoka është dënuar por me pretendimin nuk ka patur dijeni për dënimin e saj dhe për këtë arsye nuk mund të gjykohet.
Lini një Përgjigje