FLASH
Shkruar nga Pamfleti
Vdekja iu raportua zyrtarisht gjyqtarit Flávio Dino, i cili ishte përgjegjës për çështjen e ekstradimit, nëpërmjet një komunikimi zyrtar të lëshuar nga burgu
Manuel Augusto Blacker Miller, ish-ministri i Jashtëm i Perusë, ndaj të cilit ishte në fuqi një dënim me 8 vite burg dhënë nga drejtësia shqiptare për mashtrimin e dy biznesmenëve, ka ndërruar jetë në moshën 80-vjeçare. Ai ishte shtruar në spitalin Penal Hamilton Agostinho, ndërsa autoritetet shqiptare kërkonin ekstradimin e tij.
Blacker Miller ishte në një paraburgim në Brazil, pasi u arrestua në dhjetor me urdhër të Gjykatës Supreme të Brazilit, në përgjigje të një kërkese për ekstradim të paraqitur nga Shqipëria, raporton Info Bae.
Ekipi ligjor i ish-ministrit kishte raportuar vazhdimisht gjendjen e tij delikate shëndetësore, duke deklaruar se ai vuante nga një trombozë serioze dhe kërkuan revokimin e arrestit të tij në mënyrë që të mund të merrte kujdes mjekësor në shtëpi. Ata e paraqitën kërkesën tri herë dhe këmbëngulën që Zyra e Prokurorit të Përgjithshëm të vendoste për këtë çështje, pa marrë një përgjigje të favorshme.
Në janar, administrata e burgut raportoi se Blacker Miller kishte pësuar dy rrëzime brenda burgut. Pas rënies së dytë, ai u shtrua në spital për dy ditë në Spitalin e Burgut Hamilton Agostinho, ku vdiq më 23 janar. Shkaku paraprak i vdekjes, sipas informacionit të dhënë familjes, ishte një infarkt akut i miokardit. Ekipi i tij mbrojtës e konsideroi thelbësore qasjen në të dhënat mjekësore të pacientit dhe i kërkoi Gjykatës Supreme të urdhëronte publikimin e këtij informacioni.
Vdekja iu raportua zyrtarisht gjyqtarit Flávio Dino, i cili ishte përgjegjës për çështjen e ekstradimit, nëpërmjet një komunikimi zyrtar të lëshuar nga burgu. Familja e Blacker Miller udhëtoi për në Brazil për të bërë rregullimet e nevojshme.
Dënimi në Shqipëri
Ai u dënua fillimisht nga Gjykata e Tiranës në maj 2017, vendim i konfirmuar nga Apeli në nëntor 2018 dhe më pas nga Gjykata e Lartë në nëntor 2023, duke e bërë vendimin përfundimtar. Çështja lidhet me marrëveshje biznesi të viteve 2012-2013, kur Blecker Miller regjistroi në Shqipëri kompaninë “Apollon Investment” dhe u premtoi dy biznesmenëve shqiptarë, Iljaz Fisheku dhe Arben Shuaipi, investime të mëdha në projekte përpunimi mbetjesh dhe tregtimi hidrokarburesh.
Sipas hetimeve, ai mori mbi 170 mijë euro prej tyre, pa realizuar investimet e premtuara. Pas denoncimit penal të bërë në vitin 2014 nga dy biznesmenët, hetimet çuan në dënimin e ish-ministrit peruan, i cili tashmë pritet të ekstradohet në Shqipëri për vuajtjen e dënimit.
Ai ka qenë Ministër i Jashtëm në vitin 1992, kur Alberto Fujimori udhëhoqi një “grusht shteti” për marrjen e pushtetit në Peru. Blecker-Miller u akuzua së bashku me 10 kolegë të tij ministra si pjesëmarrës në atë grusht shteti. Por, deri në vitin 2009, të gjithë të akuzuarit ishin liruar nga akuzat. Prej vitit 2002, Blecker-Miller kishte jetuar lirisht në Shtetet e Bashkuara, ku ishte shndërruar në biznesmen.
Në korrik të vitit 2013, raportohej se Policia kishte arrestuar ish-ministrin peruan Blecker-Miller, të kërkuar nga vendi i tij nëpërmjet Interpol-it dhe më tej ishte liruar, pas procedurave të dyshimta.
Megjithatë, pas raportimeve për një arrestim të mundshëm të tij në verën e vitit 2013, deputeti socialist Erion Braçe, atëherë në opozitë, akuzoi Sali Berishën, kryeministrin e kohës, se kishte ndikuar për lirimin e ish-politikanit të lartë peruan, pasi “bashkë po kryejnë një biznes për përpunimin e mbetjeve në Fier”..
Po ashtu, edhe vetë Manuel Augusto Blecker-Miller mohoi që ndaj tij të kishte urdhër-kërkimi ndërkombëtar. Madje, ai deklaroi se kishte ardhur në Shqipëri që në vitin 2012 për të zhvilluar projektin e tij për përpunimin e mbetjeve.
Pas kësaj zhurme, Manuel Augusto Blecker-Miller fitoi azil politik në Shqipëri, në shtator 2013, ndërkohë që vijoi të avanconte idenë e projektit në Fier, nëpërmjet shoqërisë së tij “Apollon Investment”.
Dosja penale në Peru dhe roli politik
Blacker Miller kishte një precedent penal në Peru. Në vitin 2007, ai u dënua me 4 vite burg për pjesëmarrjen e tij në grushtin e shtetit të 5 prillit 1992, të kryer nga Alberto Fujimori, së bashku me anëtarë të tjerë të kabinetit të tij në atë kohë. Pas këtij dënimi, ai u vendos në Evropë dhe iu përkushtua aktiviteteve të biznesit, duke u bërë aksionar në një kompani lokale në Shqipëri. Ai mbajti një profil të ulët derisa hetimet për mashtrim në atë vend e sollën përsëri në qendër të vëmendjes ndërkombëtare.
Në janar 2013, shteti peruan kërkoi ekstradimin e tij, por kërkesa u refuzua sepse Blacker Miller kishte fituar shtetësinë shqiptare, gjë që i jepte atij mbrojtje nga drejtësia peruane. /Pamfleti/
Lini një Përgjigje