FLASH
Shkruar nga Pamfleti
Drejtoria e Përgjithshme e Burgjeve ka zhvilluar kontrolle të befasishme në tre institucione të vuajtjes së dënimit, ndërsa janë sekuestruar mjete komunikimi dhe sende të tjera të palejuara.
Sipas njoftimit zyrtar, kontrollet u kryen nga forcat operacionale të Drejtorisë së Policisë së Burgjeve në Fier, Vlorë e Peqin, dhe kishin si fokus evidentimin dhe goditjen e sendeve të ndaluara brenda ambienteve të burgjeve.
Gjatë operacionit u konstatuan dhe u sekuestruan aksesorë mjetesh komunikimi që përbëjnë vepër penale, mjete prerëse të improvizuara, si dhe sende të tjera të palejuara dhe të tepërta. Bie në sy dhe futja e disa kolltukëve që përdoren për ambiente jashtë banesave.
Për rastet e evidentuara është njoftuar Shërbimi i Kontrollit të Brendshëm të Sistemit të Burgjeve, i cili pritet të ndjekë procedurat e mëtejshme ligjore dhe administrative.
Drejtoria e Përgjithshme e Burgjeve deklaroi se mbetet e angazhuar për garantimin e rendit, sigurisë dhe zbatimit të ligjit në të gjitha institucionet e vuajtjes së dënimit.
Sipas autoriteteve, kontrollet do të vijojnë me intensitet të lartë në të gjitha IEVP-të në vend, ndërsa theksohet se “toleranca ndaj shkeljeve është zero”.
Lini një Përgjigje