FLASH
Shkruar nga Pamfleti
Situata dramatike e regjistruar sot në Kuçovë ka përfunduar pa pasoja tragjike, pasi punonjësja e pastrimit, e cila kishte hipur në majë të kullës së oksigjenit pranë ish-Uzinës, ka pranuar të zbresë pas negociatave me policinë.
Elona Bregu, 40 vjeçe, e pushuar nga puna, ndërmori këtë veprim në mënyrë demonstrative, pasi pretendon se ishte larguar nga detyra sepse kishte kërkuar pagën e vonuar prej dy muajsh. Ajo qëndroi për disa minuta në lartësi, duke kërcënuar se do t’i jepte fund jetës.
Pas bisedimeve me policinë vendore dhe përfaqësues të bashkisë, të cilët i premtuan se do të rikthehej në punë, 40-vjeçarja zbriti nga kulla dhe më pas u shoqërua nga efektivët për marrje në pyetje dhe ndjekjen e procedurave standarde.
Ndërkohë, edhe punonjëse të tjera të larguara nga puna u shprehën për arsyet e kësaj proteste të pazakontë.
“Nuk ja ka dhënë rrogën, e ka pushuar nga puna. Tre veta, të tre ne. Ka hequr edhe të tjerë, para katër muajsh janë hequr edhe 4 të tjerë. Na kanë hequr nga puna pse kemi vajtur në Bashki. Ne as kemi sharë dhe as ofenduar atje”, tregojnë dy nga punonjëset, gjithashtu të pushuara nga puna.
Ngjarja ka shkaktuar reagime në qytet, ndërsa pritet një qëndrim zyrtar nga Bashkia lidhur me pretendimet e ngritura nga punonjëset.
Lini një Përgjigje