FLASH
Shkruar nga Pamfleti
Stiven Shpendi po konfirmohet si një nga talentet më premtues shqiptarë në futbollin italian. Sulmuesi i Empolit zhvilloi një sezon shumë pozitiv në Serinë B, ku realizoi 15 gola dhe u rendit ndër golashënuesit më të mirë të kampionatit.
Paraqitjet e tij të mira kanë rritur jo vetëm pritshmëritë për një ftesë nga Kombëtarja shqiptare, por edhe interesimin e klubeve të Serisë A. Presidenti i Empolit, Fabricio Korsi, ka pranuar publikisht se Shpendi mund të jetë objektiv i skuadrave të elitës italiane gjatë merkatos së verës.
Në një intervistë të fundit, Korsi vlerësoi zhvillimin e sulmuesit shqiptar dhe nuk përjashtoi mundësinë e një transferimi, nëse paraqiten kushtet e duhura ekonomike.
“Shpendi është tashmë një lojtar vendimtar dhe ka ende shumë hapësira për t’u përmirësuar. Besoj se mund të ketë interes konkret nga Seria A që tani. Ne do të donim ta mbanim edhe një sezon tjetër, por gjithçka varet edhe nga aspekti ekonomik, i cili për ne është thelbësor”, deklaroi presidenti i Empolit.
Korsi theksoi gjithashtu modelin ekonomik mbi të cilin funksionon klubi, duke nënvizuar rëndësinë e investimit te lojtarët e rinj dhe shitjes së tyre për të garantuar stabilitet financiar.
“Ne bëjmë futboll pa pasur një pronar miliarder. Prej 30 vitesh funksionojmë në këtë mënyrë. Investojmë te të rinjtë, i zhvillojmë dhe më pas i shesim”, shtoi ai.
Deklaratat e presidentit italian lënë të kuptohet se e ardhmja e Shpendit mund të jetë në Serinë A, nëse gjatë verës mbërrijnë oferta të kënaqshme për Empolin.
Lini një Përgjigje