FLASH
Shkruar nga Pamfleti
“Me Trump shkoi mirë”.
Kështu e komentoi Giorgia Meloni para stafit të saj ditën e parë të samitit të G7 në Evian, duke sinjalizuar fillimin e një faze më të qetë në marrëdhëniet me presidentin amerikan Donald Trump.
Sipas mediave italiane, kryeministrja nuk zbuloi detaje nga bisedimet me Trump, por la të kuptohet se përplasjet politike dhe personale të muajve të fundit po lihen pas nga të dyja palët.
Shenjat e afrimit u bënë më të dukshme gjatë ditës së dytë të samitit, kur Meloni dhe Trump u panë duke biseduar në një atmosferë miqësore përpara një dreke pune kushtuar Iranit. Siç tregojnë pamjet e publikuara nga Palazzo Chigi, Meloni iu afrua presidentit amerikan, i cili po diskutonte me kancelarin gjerman Friedrich Merz. Më pas bisedës iu bashkua edhe presidenti i Këshillit Evropian, Antonio Costa.
“Jam braktisur...”, tha me shaka Trump, ndërsa Meloni iu përgjigj menjëherë: “Ne kemi qenë gjithmonë miq”.
Meloni mbërriti në resortin ku po zhvillohet samiti në brigjet e liqenit Leman, pranë kufirit franko-zviceran, pak para kryeministres japoneze, me të cilën kishte zhvilluar një takim më herët në Romë. Në mbërritje ajo u prit nga presidenti francez Emmanuel Macron dhe bashkëshortja e tij. Më vonë, Macron publikoi në rrjetet sociale videon e përshëndetjes së tyre të shoqëruar me tingujt e këngës “Felicità” të Al Bano dhe Romina Power.
Përpara nisjes drejt Francës, Italia iu bashkua një deklarate të përbashkët me Francën, Gjermaninë dhe Britaninë e Madhe, në të cilën katër vendet vlerësojnë se një marrëveshje për paqe mes Uashingtonit dhe Teheranit përbën një mundësi për rikthimin e stabilitetit rajonal dhe forcimin e ekonomisë globale.
Qeveria italiane, së bashku me partnerët evropianë, u angazhua gjithashtu për një mision mbrojtës dhe të pavarur në Ngushticën e Hormuzit, me qëllim garantimin e sigurisë së trafikut tregtar dhe kryerjen e operacioneve të çminimit.
Lini një Përgjigje