FLASH
Shkruar nga Pamfleti
Në qendër të hetimeve ndodhet sabotimi i linjës hekurudhore të shpejtësisë së lartë Romë-Firence, i kryer më 14 shkurt 2026.
Një operacion i gjerë antiterrorizëm i zhvilluar nga autoritetet italiane ka çuar në shkatërrimin e një qelize terroriste dhe arrestimin e shtatë personave, të cilët akuzohen për organizim të një grupi kriminal kundër rendit demokratik.
Operacioni u realizua nga Njësia e Operacioneve Speciale DIGOS e Romës, në bashkëpunim me Drejtorinë Qendrore të Policisë së Parandalimit dhe nën koordinimin e Prokurorisë së Romës. Sipas hetuesve, grupi vepronte sipas strukturave tradicionale të lëvizjes anarkiste italiane dhe kishte krijuar një rrjet të organizuar me bazë në kryeqytet, por me degëzime dhe bashkëpunëtorë në disa qytete të tjera të vendit, përfshirë Bolonjën, Milanon, Napolin dhe Forlì-Cezena.
Në qendër të hetimeve ndodhet sabotimi i linjës hekurudhore të shpejtësisë së lartë Romë-Firence, i kryer më 14 shkurt 2026. Sipas autoriteteve, dy prej të arrestuarve dyshohen si autorë të drejtpërdrejtë të sulmit, gjatë të cilit u përdorën mjete shpërthyese artizanale, por me efekt të lartë shkatërrues. Sulmi shkaktoi dëme të konsiderueshme në infrastrukturën hekurudhore, me një kosto riparimi që kap shifrën e 455 mijë eurove.
Hetuesit bëjnë të ditur se sabotimi i linjës Romë-Firence nuk ishte një rast i izoluar. Një aksion i ngjashëm ishte kryer edhe në linjën Romë-Napoli, ndërsa të dyja sulmet u morën përsipër përmes një faqeje interneti të krijuar posaçërisht për publikimin e komunikatave të grupit. Në deklaratat e publikuara online përmendej lidhja e aksioneve me Lojërat Olimpike Dimërore Milano-Kortina dhe kundërshtimi i asaj që grupi e cilësonte si militarizim të territorit dhe infrastrukturës.
Sipas dokumenteve hetimore, organizata synonte të godiste objekte dhe struktura të konsideruara strategjike për shtetin italian, me qëllim krijimin e pasigurisë dhe ushtrimin e presionit ndaj institucioneve. Provat e mbledhura nga DIGOS kanë bërë që shtatë të dyshuarit të akuzohen për konspiracion me qëllime terroriste ose përmbysjen e rendit demokratik.
Një element kyç i hetimit lidhet me figurën e Alfredo Cospitos, anarkistit të njohur italian që mbahet nën regjimin e sigurisë së lartë 41-bis. Sipas autoriteteve, mbështetja për Cospiton përbënte një nga motivet kryesore të aktivitetit të grupit.
Në një nga përgjimet e përfshira në dosjen hetimore prej 94 faqesh, një prej të dyshuarve shprehet se “duhet bërë diçka për ta detyruar shtetin të përballet me faktin se mbajtja e një anarkisti nën regjimin 41-bis është një bezdi e vërtetë”. Në një tjetër bisedë të përgjuar, anëtarët e grupit flasin për nevojën e vazhdimit të “veprimit të drejtpërdrejtë” dhe konfliktit si mënyra e vetme për të arritur rezultate politike.
Sipas hetuesve, këto deklarata dëshmojnë ekzistencën e një strategjie të mirëorganizuar që synonte jo vetëm propagandën ideologjike, por edhe realizimin e veprimeve konkrete të dhunshme kundër shtetit dhe infrastrukturave publike.
Gjatë operacionit u kryen kontrolle dhe bastisje në disa rajone të Italisë me mbështetjen e njësive DIGOS të Milanos, Bolonjës, Napolit, Torinos, Ternit dhe Rietit. Mes objekteve të kontrolluara ishte edhe qendra anarkiste “Bencivenga Occupato” në Romë, e konsideruar nga hetuesit si një nga pikat e referimit për aktivitetet e grupit.
Autoritetet italiane theksojnë se hetimi ka nxjerrë në pah ekzistencën e lidhjeve të gjera mes qarqeve anarkiste radikale në Itali dhe kontakteve të tyre jashtë vendit. Për këtë arsye, operacioni është zhvilluar në koordinim të ngushtë me Drejtorinë Kombëtare Antimafia dhe Antiterrorizëm.
Pas operacionit reagoi edhe ministri i Brendshëm italian, Matteo Piantedosi, i cili përgëzoi forcat e rendit dhe organet e drejtësisë për atë që e cilësoi si një goditje të rëndësishme ndaj terrorizmit të brendshëm.
“Edhe sot duartrokas gratë dhe burrat e Policisë së Shtetit dhe të gjithë hetuesit që, përmes një aktiviteti kompleks dhe shumë të kualifikuar, kanë shkatërruar një rrjet subversiv me origjinë anarkiste që vepronte në të gjithë territorin kombëtar dhe kishte vënë në shënjestër infrastruktura strategjike të vendit, përfshirë rrjetin e trenave me shpejtësi të lartë”, deklaroi Piantedosi.
Ministri shtoi se hetimet tregojnë se mobilizimi ekstremist i zhvilluar vitet e fundit rreth çështjes së Alfredo Cospitos ka vazhduar të ushqejë forma radikalizimi dhe veprime të dhunshme kundër institucioneve demokratike.
Sipas tij, operacioni konfirmon kapacitetin e lartë të strukturave italiane të sigurisë për të parandaluar dhe goditur kërcënimet terroriste, si dhe vëmendjen e vazhdueshme të autoriteteve ndaj qarqeve ekstremiste që synojnë destabilizimin e rendit publik dhe institucioneve demokratike në vend.
Lini një Përgjigje