FLASH
Shkruar nga Pamfleti
Futbollistët shqiptarë që aktivizohen në kampionatin italian vijojnë të jenë të shumtë dhe të shpërndarë në të gjitha nivelet e ligave, duke ofruar alternativa të reja për Kombëtaren. Mes emrave që po tërheqin gjithnjë e më shumë vëmendje këtë sezon janë binjakët Kristian dhe Stiven Shpendi.
Të lindur më 19 maj 2003 në Ankona, dy vëllezërit po shndërrohen në një nga historitë më interesante të Serisë B. Paraqitjet e tyre dhe instinkti për gol kanë tërhequr jo vetëm vëmendjen e klubeve, por edhe të mediave italiane, të cilat u kanë kushtuar artikuj dhe intervista të shumta.
Me rrënjë shqiptare dhe të rritur me të njëjtin pasion për futbollin, të dy lojtarët kanë zgjedhur të përfaqësojnë Shqipërinë, duke konfirmuar orientimin e tyre drejt kuqezinjve për të ardhmen. Megjithatë, pavarësisht formës së mirë, ata nuk janë përfshirë nga stafi teknik i Kombëtares në ndeshjet kualifikuese të Botërorit apo në fazën “play-off”, edhe pse skuadra kishte mungesa në repartin ofensiv.
Edhe pse ndajnë shumë të përbashkëta, sezoni aktual i ka vendosur në trajektore të ndryshme.
Kristian Shpendi, me fanelën e Çezenës, është kthyer në një pikë kyçe të sulmit, duke realizuar 10 gola dhe duke treguar qendrueshmëri në performancë.
Stiven Shpendi, nga ana tjetër, po kalon një sezon edhe më produktiv me Empolin në Serinë B, ku ka shënuar 13 gola. Vetëm një prej tyre ka ardhur nga penalltia, çka thekson aftësinë e tij për të vendosur ndeshjet nga loja e hapur.
Historia e binjakëve Shpendi është ajo e dy talenteve që zhvillohen paralelisht, me synimin për të arritur majat e futbollit. Në një kampionat kërkues si Seria B, ata po ndërtojnë profilin e tyre dhe po japin sinjale të qarta për të ardhmen.
Të dy lojtarët kanë shprehur publikisht dëshirën për të veshur fanelën e Shqipërisë, ndërsa ëndrra për të qenë së bashku në Kombëtare mbetet një objektiv i madh personal dhe profesional.
Me sezonin drejt fundit dhe me ritmin që po tregojnë, binjakët Shpendi konsiderohen kandidatë seriozë për hapa të mëdhenj në karrierë. Performancat e tyre i bëjnë potencialisht emra të rëndësishëm jo vetëm në futbollin italian, por edhe për të ardhmen e Kombëtares shqiptare.
Lini një Përgjigje