FLASH
Shkruar nga Pamfleti
Momenti kur trajneri i Norvegjisë, Stale Solbaken, kapërceu barrierat e sigurisë për të puthur bashkëshorten e tij Aniken pas fitores 3-2 ndaj Senegalit, u shndërrua në një nga skenat më prekëse të Kupës së Botës.
Kamerat televizive fiksuan çastin kur Solbaken u ngjit mbi gardh për të festuar kualifikimin e Norvegjisë në raundin e 1/32-ave së bashku me partneren e tij. Pamjet u përhapën me shpejtësi në rrjetet sociale, duke prekur mijëra tifozë në mbarë botën.
Megjithatë, pas këtij momenti emocionues fshihet një histori e vështirë personale që çifti ka kaluar ndër vite.
Në vitin 2001, kur ishte ende futbollist i Kopenhagenit, Solbaken pësoi një atak në zemër në tunelin e stadiumit pas një ndeshjeje ndaj Alborgut. Jeta e tij u shpëtua nga mjeku i klubit, Frank Odgard, i cili arriti ta ringjallte.
Mjekët zbuluan se zemra e ish-mesfushorit kishte pushuar së rrahuri për 12 minuta, ndërsa ai kishte mbetur pa frymëmarrje për shtatë minuta. Vetë mjeku e cilësoi mbijetesën e tij si një mrekulli.
Pas ngjarjes dramatike, Solbaken kaloi disa ditë në kujdes intensiv, në një gjendje kome të induktuar. Vite më vonë, ai rrëfeu përvojën e pazakontë që përjetoi kur u zgjua.
“Në fillim nuk mund të shihja asgjë, vetëm errësirë totale. Pastaj u shfaq një dritë blu e çelët... le ta quajmë tunel. Ishte një dritë e bukur. Kur më zgjuan, mendova: ‘Oh jo, a mund të qëndroj atje edhe pak?’. Nuk kam asnjë shpjegim për atë që pashë”, ka treguar Solbaken.
Pas këtij episodi, trajneri aktual i kombëtares norvegjeze u detyrua të vendoste një defibrilator në zemër dhe t’i jepte fund karrierës si futbollist në moshën 33-vjeçare.
Ai ka pranuar se periudha ishte veçanërisht e vështirë për bashkëshorten e tij Aniken, e cila në atë kohë ishte vetëm 24 vjeçe. Sipas tij, sprova e rëndë i bashkoi edhe më shumë.
Gjatë ditëve kur Solbaken ndodhej në koma, familjarët dhe miqtë e tij përballeshin me pasiguri të mëdha për fatin e tij. Aq kritike ishte gjendja, saqë kishte nisur të diskutohej edhe organizimi i funeralit.
“Prindërit e mi fluturuan menjëherë për në Danimarkë. Më thanë se gjatë fluturimit nëna ime filloi të organizonte funeralin tim. Në fillim të gjithë shqetësoheshin nëse do të mbijetoja, më pas nëse do të pësoja dëmtime në tru. Këto ishin mendimet që torturonin familjen time dhe shokët e skuadrës, të cilët më panë të rrëzohesha, të vdisja dhe të ringjallesha”, ka rrëfyer ai.
Sot, pas më shumë se dy dekadash nga ajo ngjarje që i ndryshoi jetën, Solbaken vazhdon të jetë një figurë e rëndësishme e futbollit norvegjez, ndërsa momenti i festimit me bashkëshorten pas fitores ndaj Senegalit u pa nga shumëkush si simbol i një historie dashurie dhe mbijetese.
Lini një Përgjigje