FLASH
Shkruar nga Pamfleti
Ernest Muçi po kalon një moment pozitiv në karrierën e tij, teksa aktivizohet në formë huazimi me Trabzonsporin. Mesfushori me tipare sulmuese ka spikatur me paraqitjet e fundit, duke ndikuar në ecurinë e skuadrës, e cila synon një vend në kompeticionet europiane, përfshirë edhe Champions League.
Në sfidën e fundit ndaj Eyupspor, Trabzonspori arriti një fitore minimale 0-1 në transfertë, duke vijuar serinë e rezultateve pozitive. Performancat e Muçit kanë tërhequr vëmendje jo vetëm në ambientin e klubit aktual, por edhe te ish-skuadra e tij, Beşiktaş.
Një video e bërë virale në rrjetet sociale tregon një moment pas ndeshjes, ku një tifoz i Beşiktaş i kërkon Muçit rikthimin në ekip. Reagimi i lojtarit, që duket se e aprovon kërkesën, ka nxitur diskutime mbi mënyrën si është menaxhuar më herët nga klubi i Stambollit.
Ndërkohë, sipas raportimeve, Trabzonspori pritet të ndërmarrë hapa për të blerë përfundimisht kartonin e lojtarit. Megjithatë, e ardhmja e Muçit mbetet e hapur, pasi interesimi për të raportohet edhe nga klube jashtë Turqisë.
Lini një Përgjigje