FLASH
Shkruar nga Pamfleti
Juventusi ka marrë një fitore të rëndësishme në transfertë ndaj Udinezes, duke triumfuar me rezultatin minimal 0-1 në ndeshjen e vlefshme për javën e 29-të të Serisë A.
Sfida u zhbllokua në minutën e 38-të. Pas një topi të gjatë nga mbrojtja, Kenan Jildiz shërbeu saktë për Zheremi Boga, i cili përfitoi nga rasti dhe e dërgoi topin në rrjetë, duke kaluar bardhezinjtë në avantazh.
Pak minuta më vonë, në të 42-ën, Boga pati mundësinë ideale për të dyfishuar rezultatin, por nuk arriti të finalizonte me sukses. Pjesa e parë u mbyll me epërsinë minimale të Juventusit, 0-1.
Në fillim të pjesës së dytë, Juventusi u detyrua të bëjë një zëvendësim të detyruar: Kefren Turam u largua nga fusha për shkak dëmtimi dhe vendin e tij e mori mesfushori holandez Teun Kupmeiners.
Udineze iu afrua golit të barazimit në minutën e 51-të, kur Ekelenkamp pati një mundësi të mirë, por nuk arriti ta konkretizonte.
Në minutën e 74-të, Juventusi mendoi se kishte dyfishuar shifrat. Françisko Konceisao realizoi pas një asisti të bukur nga Jildiz, por pas rishikimit me VAR, goli u anulua për pozicion jashtë loje të Kupmeiners gjatë aksionit.
Rezultati mbeti i pandryshuar deri në fund të takimit. Edhe në këtë sfidë, Edon Zhegrova nuk mori asnjë minutë aktivizim.
Me këtë fitore, Juventusi ngjitet përkohësisht në vendin e katërt në renditjen e Serie A me 53 pikë, ndërsa Udineze mbetet në vendin e 11-të.
Lini një Përgjigje