FLASH
Shkruar nga Pamfleti
Kanë përfunduar dy nga ndeshjet e javës së 30-të në Premier Ligë, të cilat kanë prodhuar edhe disa rezultate surprizë.
Në stadiumin “Emirates”, kryesuesit e Arsenalit siguruan një fitore 2-0 përballë Evertonit. Pjesa e parë ishte më e mirë për miqtë, të cilët krijuan të paktën tre raste të mira shënimi. Rasti më i rrezikshëm erdhi nga Duajt MekNeil, por goditja e tij u ndal nga shtylla e majtë.
Fraksioni i dytë i lojës u zhvillua me më pak ritëm dhe rastet për gol ishin të pakta. Zhbllokimi i rezultatit erdhi vetëm në minutën e 89-të: pas një krosimi të Maks Douman në zonë dhe një daljeje të gabuar të portierit Xhordan Pikford, Viktor Giokeres përfitoi duke dërguar topin në rrjetë. Në minutën e fundit shtesë, vetë Douman realizoi golin e dytë, duke vulosur fitoren 2-0 për londinezët.
Me këtë sukses, Arsenali kryeson renditjen me 70 pikë, 10 më shumë se Mançester Siti i vendit të dytë, i cili ka edhe dy ndeshje më pak dhe pritet të luajë në transfertë ndaj Uest Hemit.
Ndërkohë, në “Stamford Bridge”, Çelsi u mposht 0-1 nga Njukasëlli. Miqtë kaluan në avantazh që në minutën e 8-të, kur pas një topi të gjatë të Livramentos nga mbrojtja drejt Xho Uillok, ky i fundit asistoi për Entoni Gordon, i cili realizoi golin e vetëm të ndeshjes.
Pjesa e parë u mbyll me avantazhin e Njukasëllit dhe, pavarësisht përpjekjeve të Çelsit në fraksionin e dytë, rezultati mbeti i pandryshuar.
Pas kësaj ndeshjeje, Çelsi mban vendin e pestë me 48 pikë, ndërsa Njukasëlli renditet në vendin e nëntë në klasifikimin e Premier Ligës.
Lini një Përgjigje