FLASH
Shkruar nga Pamfleti
Në stadiumin legjendar "Azteca", Meksika triumfoi 2-0 ndaj Ekuadorit në orët e para të mëngjesit të së mërkurës, duke siguruar kalimin në fazën e 1/8-ave të Kupës së Botës 2026.
Takimi, i vlefshëm për fazën e 1/16-ave, ishte planifikuar të niste në orën 03:00 me kohën shqiptare, por u shty me një orë për shkak të reshjeve të dendura të shiut dhe aktivitetit të lartë elektrik që përfshiu kryeqytetin meksikan.
Vendasit dominuan sfidën që në fillim dhe zgjidhën gjithçka brenda pjesës së parë. Julian Quiñones zhbllokoi rezultatin në minutën e 22-të, ndërsa Raul Jiménez dyfishoi epërsinë në minutën e 31-të, duke vulosur kualifikimin e Meksikës.
Me golin e shënuar ndaj Ekuadorit, Jiménez ngjitet në vendin e dytë të golashënuesve më të mirë në historinë e përfaqësueses meksikane me 48 gola, duke u renditur pas Javier "Chicharito" Hernández.
Ekuadori e mbylli ndeshjen me dhjetë lojtarë, pasi Piero Hincapié u ndëshkua me karton të kuq në minutën e pestë shtesë.
Falë këtij suksesi, Meksika avancon në fazën e 1/8-ave, ku do të përballet me fituesin e çiftit Angli – Republika Demokratike e Kongos. Meksikanët vazhdojnë paraqitjen mbresëlënëse në këtë Botëror, me katër fitore radhazi dhe si e vetmja skuadër që ende nuk ka pësuar gol.
Lini një Përgjigje