FLASH
Shkruar nga Pamfleti
Në Austri është raportuar për një ndryshim të mundshëm në të ardhmen e Jurgen Klop në strukturat e Red Bull, por drejtuesit e kompanisë kanë mohuar zyrtarisht këto pretendime.
Sipas të përditshmes austriake “Salzburger Nachrichten”, trajneri gjerman, 58 vjeç, pritet të largohet nga posti i tij si përgjegjës global në departamentin e futbollit të Red Bull, vetëm një vit pas marrjes së kësaj detyre.
Gazeta shkruan se misioni i Klop ishte t’i jepte një shtysë rritjes sportive të klubeve në pronësi të grupit Red Bull, me synimin për t’i kthyer ato në pretendente serioze për tituj. Sipas raportimit, evoluimi i deritanishëm nuk ka përmbushur pritshmëritë e brendshme, çka do t’i hapte rrugë një largimi të parakohshëm të tij nga posti drejtues.
Gjithnjë sipas “Salzburger Nachrichten”, Red Bull nuk do ta pengonte Klopp-in që në verë të rikthehej në pankinë si trajner. Madje, raportohet se është identifikuar edhe një pasues i mundshëm: Oliver Glasner, aktualisht trajner Kristal Palas, i cili pritet të largohet nga klubi londinez në fund të sezonit. Glasner, që ka një të kaluar në strukturat e Red Bull, thuhet se do ta shihte me interes marrjen e këtij funksioni.
Nga ana tjetër, Shefi Ekzekutiv i Red Bull, Oliver Mintzlaff, i ka përgënjeshtruar publikisht këto raportime.
“Është një budallallëk dhe totalisht i pabazë. Është krejtësisht e kundërta; ne jemi shumë të kënaqur me punën e Jurgen Klop. Ai investon shumë, është vazhdimisht në kontakt me trajnerët dhe drejtorët sportivë dhe po zhvillon në mënyrë të qëndrueshme filozofinë tonë futbollistike. Jemi të bindur se është personi i duhur për këtë post. Këtu përqendrohet i gjithë fokusi dhe energjia jonë”, deklaroi Mintzlaff.
Zyrtarët e kompanisë kujtojnë gjithashtu se kontrata e Klop me Red Bull është e vlefshme deri në vitin 2029.
Pavarësisht përgënjeshtrimeve, zërat për një rikthim të mundshëm të Klop në pankinë janë shtuar. Emri i tij është lidhur prej kohësh me Real Madridin, edhe pse nuk ka asnjë konfirmim zyrtar nga palët e përfshira.
Aktualisht, situata mbetet në nivel raportimesh mediatike dhe deklaratash zyrtare kontradiktore, ndërsa e ardhmja e trajnerit gjerman në strukturat e Red Bull vazhdon të jetë objekt spekulimesh.
Lini një Përgjigje