FLASH
Shkruar nga Pamfleti
Presidentja e Kosovës, Vjosa Osmani ka zhvilluar ditën e sotme një takim me të dërguarit e SHBA-së dhe BE-së, Gabriel Escobar dhe Mirosllav Lajçak në lidhje me situatën në veri të vendit.
Me anë të një njoftimi për mediat, Presidenca bën me dije se Osmani u ka thënë Escobar dhe Lajçak se vetëm ndëshkimi i grupeve kriminale mund të çojë në një “stabilitet të qëndrueshëm dhe afatgjatë”.
“Prandaj presim që institucionet ligjzbatuese ta bëjnë punën e tyre, në përputhje me ligjin, në mënyrë që grupet kriminale përgjegjëse për dhunën të përballen me drejtësinë”, tha Osmani.
Presidentja e Kosovës ka përmendur gjithashtu edhe mundësinë e organizimit të zgjedhjeve të reja që ka qenë kërkesë e Escobarit dhe Lajçakut në takimin e një dite më parë me kryeministrin e Kosovës, Albin Kurti.
“Zgjedhjet e reja në komunat në veri të vendit mund të organizohen në përputhje me kornizën aktuale kushtetuese e ligjore dhe në këtë kontekst, duhet të sigurohet pjesëmarrje demokratike e qytetarëve që jetojnë në këto katër komuna”, u shpreh presidentja.
Osmani theksoi më tej se Kosova është e përkushtuar të punojë në bashkëpunim me aleatët ndërkombëtarë të saj.
Lini një Përgjigje