FLASH
Shkruar nga Pamfleti
Sipas Reuters, marrëveshja parashikon transferimin e miliarda dollarëve drejt Iranit dhe lidhet me përpjekjet për uljen e tensioneve dhe rivendosjen e marrëdhënieve mes Teheranit dhe Abu Dhabit.
Emiratet e Bashkuara Arabe (EBA) kanë rënë dakord të lirojnë miliarda dollarë fonde për Iranin, raportoi Reuters duke cituar katër burime anonime të njohura me marrëveshjen, e cila nuk ishte bërë publike më parë.
Lirimi i fondeve iraniane ka qenë një nga çështjet kryesore në bisedimet mes Shteteve të Bashkuara dhe Iranit. Teherani ka deklaruar vazhdimisht, përfshirë përmes ministrit të Jashtëm Abbas Araghchi, se së shpejti do të rifitojë kontrollin mbi këto mjete financiare.
Sipas Reuters, EBA ka pranuar të vërë në dispozicion gjithsej 10 miliardë dollarë, ndërsa më shumë se 3 miliardë dollarë janë transferuar tashmë.
Dy burime të tjera të informuara për marrëveshjen vlerësuan se shuma totale e fondeve të përfshira mund të arrijë deri në 20 miliardë dollarë. Sipas tyre, ky veprim u dakordësua në këmbim të ndalimit të kundërpërgjigjeve iraniane ndaj Emirateve të Bashkuara Arabe.
Nuk është e qartë nëse fondet që do të transferohen janë mjete financiare të Emirateve apo fonde iraniane të bllokuara prej kohësh në sistemin bankar të EBA-së ose në juridiksione të tjera.
Një zyrtar i Emirateve, i pyetur nga Reuters për këtë çështje, deklaroi se vendi po punon për uljen e tensioneve dhe promovimin e paqes në rajon.
“Politika e jashtme e Emirateve të Bashkuara Arabe udhëhiqet nga promovimi i de-përshkallëzimit dhe reduktimi i tensioneve në të gjithë rajonin, duke mbështetur njëkohësisht paqen dhe stabilitetin afatgjatë”, tha ai. Zyrtari shtoi se EBA mbështet përpjekjet, përfshirë ato të Shteteve të Bashkuara, për të mbrojtur popujt e rajonit nga pasojat e konflikteve.
Më parë zëvendëspresidenti amerikan J.D. Vance kishte deklaruar se nuk do të ketë lirim fondesh për Iranin si kusht për nënshkrimin e një marrëveshjeje me SHBA-në. Ai theksoi se çdo marrëveshje e mundshme është konceptuar në mënyrë që përfitimet ekonomike për Teheranin të varen nga përmbushja e detyrimeve të tij.
Reuters vëren se kjo marrëveshje përfaqëson një ndryshim të rëndësishëm krahasuar me periudhën e armiqësisë së hapur mes EBA-së dhe Iranit gjatë pjesës më të madhe të konfliktit. Sulmet iraniane, sipas agjencisë, kishin ndikuar negativisht në sektorin turistik dhe klimën e biznesit në Dubai, duke dëmtuar imazhin e sigurisë që mbështet rolin e vendit si qendër rajonale tregtare.
Një nga burimet tha se marrëveshja krijon një rrugë për zbutjen e përplasjes mes SHBA-së dhe Iranit pa e detyruar asnjërën palë të bëjë lëshime të drejtpërdrejta. Sipas këtij burimi, Irani mund ta paraqesë marrëveshjen si kompensim për dëmet e luftës, Uashingtoni mund të argumentojë se nuk ka kryer pagesa, ndërsa Abu Dhabi siguron interesat e veta të sigurisë dhe statusin e Dubait si qendër tregtare.
Një burim tjetër deklaroi se, në këmbim të disbursimit të fondeve, Irani do të ndalonte sulmet me raketa dhe dronë ndaj Emirateve, ndërsa të dy vendet do të nisin rindërtimin e marrëdhënieve dypalëshe përmes shkëmbimit të informacionit dhe bashkëpunimit ekonomik. I njëjti burim shtoi se Teherani ka kontaktuar të paktën dy vende të tjera arabe të Gjirit për marrëveshje të ngjashme.
Sulmi i fundit i njohur drejtpërdrejt i Iranit ndaj Emirateve të Bashkuara Arabe, sipas Reuters, ndodhi më 4 maj në portin e Fujairah.
Lini një Përgjigje