FLASH
Shkruar nga Pamfleti
Aktualisht në qarkun Fier ka reshje shiu me intensitet të ulët. Deri në këto momente, nuk ka raportime për situata problematike në terren.
Akset rrugore janë të aksesueshme normalisht. Furnizimi me energji elektrike dhe furnizimi me ujë të pijshëm është në normalitet.
Nivelet e lumenjve Seman dhe Shkumbin në kuota normale. Niveli i prurjeve në lumin Vjosë ka arritur në 7.1 m në Urën e Mifolit (krahu i Fierit),
Ne fshatrat Kashisht, Kafaraj dhe Cerven janë nën ujë rreth 150 ha tokë bujqësore, brenda argjinaturave.
Referuar monitorimit në terren, konstatohet rritje e menjëhershme e nivelit të prurjeve dhe përhapja ne tokat bujqësore.
Si pasojë e prurjeve të lumit Vjosa, ka prezencë uji edhe në Stacionin e Pompimit të Kafaraj, Njesia Adm Frrakull, nga ku behet edhe furnizimi me uji i qytetit të Fierit.
Si masë paraprake janë stakuar disa nga pompat në puset që janë në afërsi të lumit Vjosa dhe po punohet me kapacitet më të reduktuar nëpërmjet disa puseve të tjera që ndodhen disi më larg. Kjo masë e marrë nga UKF nuk ka cenuar furnizimin me ujë të qytetit, deri në këto momente.
Është bërë njoftimi i banorëve të fshatrave Cerven, Ferras dhe Kashisht për çdo evakuim te mundshëm.
Situatat pritet te jete kritike edhe për orët në vazhdim, ndërsa po monitorohet në terren nga Institucioni i Prefektit dhe Strukturat e Bashkisë Fier.
Emergjencat Civile të Bashkisë Fier, së bashku me kryebashkiakun Armando Subashi janë duke monitoruar në terren situatën. Ata janë përqendruar përgjatë argjinaturës së Çervenit, ku dy fadroma dhe mjete të tonazhit të rëndë janë duke punuar për riparimin e disa segmenteve të rrezikuara nga dalja e lumit Vjosë.
Reshjet intensive të datës 7 janar 2026 kanë vënë në alarm disa qytete të vendit, përfshirë Durrësin, Fierin dhe Shkodrën, ku janë regjistruar përmbytje të lokalizuara. Tashmë, rreziku po zhvendoset në Tiranë, ku lumi Lana është shumë pranë daljes nga shtrati.
Situata më problematike paraqitet në zonën e Pallatit me Shigjeta, ku Lana është ngritur deri në nivelin e lulishtes dhe pritet që në orët në vijim, nëse reshjet vijojnë me të njëjtin intensitet, të dalë edhe në rrugë. Kjo zonë është ndër më të ekspozuarat ndaj përmbytjeve sa herë ka reshje të dendura, dhe historikisht ka pasur dalje të Lanës nga shtrati.
Fatmirësisht, deri në këto momente nuk raportohet për trafik të rënduar apo për bllokime të rrugëve në kryeqytet. Megjithatë, autoritetet lokale ndodhen në gatishmëri, ndërsa Inspektorati i Emergjencave Civile po monitoron situatën nga afër.
Pas Durrësit, ku disa rrugë u përmbytën dje pasdite, dhe pas alarmeve në jug për rritje të nivelit të lumenjve si Vjosa, pritet që edhe Tirana të mos i shpëtojë pasojave të motit të keq, nëse reshjet vijojnë në këtë formë gjatë natës dhe ditëve në vijim.
Situata nga reshjet në qarkun e Beratit paraqitet e tillë: 10 fshatra në Njësinë Administrative Potom në Skrapar janë pa energji elektrike. Niveli i lumit Osum është drejt rritjes, ndërsa disa hektarë tokë bujqësore në fshatin Veterrik dhe zonën e Dafinave në bashkinë Dimal ndodhen nën uje.
Reshjet e shiut që kanë filluar që prej mbrëmjes së djeshme kanë nisur të shfaqin edhe problemet e para në qarkun e Beratit.
Era e fortë ka lënë që prej mëngjesit të sotëm pa drita 10 fshatrat: Backë, Gjergjovë, Koprenckë, Gërmenj, Visockë, Qafë Helms, Melskë, Nikollarë, Dyrmish dhe Staraveckë në Njësinë Administrative Potom në bashkinë Skrapar.
Burime nga OSHEE Berat konfirmojnë se grupet e punës janë në terren dhe po punohet për riparimin e shtyllave të dëmtuara nga era dhe rikthimin e energjisë në këto fshatra malore.
Po kështu, edhe niveli i lumit Osum është duke u rritur aktualisht ai ndodhet në kuotat mesatare.
Për shkak të rritjes së nivelit të ujërave të lumit Osum janë në ujë disa hektar tokë bujqësore në fshatin Veterrik dhe zonën e Dafinave në bashkinë Dimal.
Gjatë mesditës së sotme ka pasur prezencë gurësh në vendin e quajtur “Rripi i Strorës” në Skrapar por pa penguar qarkullimin, ku po punohet për pastrimin e tyre. Deri më tani nuk raportohen situata emergjente, rrugë apo banesa të rrezikuara nga uji.
Reshjet e dendura të shiut të rëna në orët e fundit kanë nxjerrë nga shtrati lumin e Vjosës, pranë Urës së Mifolit në Vlorë, duke shkaktuar përmbytje në tokat bujqësore dhe rrezik për banesat përreth.
Niveli arriti deri në 8 metra. Deri më tani, raportohet për rreth 40 hektarë tokë të përmbytur. 13 familje me shtëpi pranë shtratit të lumit u evakuuan, ndërsa 14 të tjera rrezikohen. Reshjet intensive shkaktuan rrëshqitje të dherave në fshatin Vajzë të bashkisë Selenicë, duke çarë fillimisht rrugën dhe duke shkatërruar 2 banesa menjëherë poshtë rrugës.
Niveli në rritje i prurjeve në lumin Vjosë, shkaktoi probleme edhe në krahun tjetër të urës së Mifolit, në fshatrat e Fierit Çerven, Kashishtë e Ferras ku tokat bujqësore janë brenda argjinaturës përgjatë lumit.
Reshjet me intensitet të lartë dhe të zgjatura në 3 orë pa mbarim gjatë mëngjesit nxorën nga shtrati edhe përroin Lunjë në Lushnje, duke përmbytur disa toka të mbjella dhe serat në Karbunarë, por situata sipas autoriteteve është nën kontroll, pasi hidrovorët kanë punuar me kapacitet të plotë.
Qindra hektarë tokë janë përmbytur nga shiu në qarkun e Shkodrës. Nga informacionet e përditësuara deri në ora 15:30, situata paraqitet si më poshtë:
Në Bashkinë Shkodër vijon puna për montimin e urës tip “Bailey” në fshatin Bardhaj, ndërkohë që strukturat e Emergjencave Civile po monitorojnë nga afër zonat me prezencë uji.
Në Bashkinë Malësi e Madhe, në fshatin Reze e Vështit, ka prezencë uji në rrugën e fshatit, ndërsa po vijon pastrimi i kanaleve dhe rregullimi i rrugës pranë Përroit të Thatë në fshatin Kamicë. Në fshatin Vukpalaj raportohet prezencë uji në një banesë, ndërsa Emergjencat Civile, Shërbimi Zjarrfikës dhe drejtuesit vendorë janë në terren dhe në gatishmëri për ndërhyrje apo evakuim, nëse do të jetë e nevojshme.
Reshjet e shiut në Bashkinë Fushë Arrëz vijojnë me intensitet të lartë dhe si rezultat, kanë shkaktuar përkeqësim të situatës në disa rrugë rurale. Në njësitë administrative Iballe, Fierzë, Blerim dhe Qafë Mali, si pasojë e vërshimit të ujërave në rrugë, kanë shkaktuar dëmtimin e tyre.
Në fshatin Obot, Njësia Administrative Ana e Malit, forcat e Regjimentit të Këmbësorisë së Veriut kanë angazhuar një mjet dhe 3 efektivë në terren. Prania e ujit në rrugë është rreth 40 cm.
Sipas të dhënave të DRUK Lezhë, lumenjtë Drin, Buna, Kir, Gjadër, si dhe përrenjtë Glinë dhe Përroi i Thatë, kanë rënie të prurjeve dhe të nivelit të ujit, me tendencë në zbritje. Diga e Rezervuarit të Shkodrës nuk paraqet rrezik dëmtimi apo përmbytjeje. Hidrovoret e Velipojës, në Vilun dhe Cas, janë në gatishmëri dhe funksionojnë me kapacitet të plotë.
Nga OSHEE Shkodër bëhet me dije se furnizimi me energji elektrike paraqitet në gjendje normale. Parashikohet ndërprerje e pjesshme e energjisë elektrike në zonën e Bushatit, për shkak të punimeve nga OST në linjën 110 kV.
Ndërkohë, sot pasdite (e mërkurë, dt. 07) dhe nesër (e enjte, dt. 08) në qarqet Shkodër, Dibër, Lezhë, Durrës, Tiranë, Elbasan, Fier, Berat, Korçë, Vlorë dhe Gjirokastër priten reshje intensive, ndërsa në qarkun Kukës priten reshje mesatare deri lokalisht intensive. Reshjet priten të shoqërohen me shtrëngata. Në Veri, Lindje dhe Juglindje në lartësitë mbi 500 m nga niveli i detit reshjet do të jenë në formë dëbore.
Situata në Novoselë është bërë kritike pasditen e së mërkurës, pasi lumi Vjosë ka arritur nivelin 8 metra, një prag alarmi që paralajmëron rrezik real për përmbytje. Autoritetet lokale dhe qendrore kanë aktivizuar planet e emergjencës dhe kanë vendosur në gatishmëri të gjitha strukturat e terrenit.
Banorëve u është bërë thirrje që të tregojnë kujdes maksimal dhe të shmangin lëvizjet pranë brigjeve të lumit. “Orët në vijim do të jenë të vështira. Situata po monitorohet në mënyrë intensive dhe jemi të angazhuar për të garantuar sigurinë e komunitetit”, deklaruan përfaqësues të emergjencave civile në Vlorë.
Përveç Novoselës, edhe zona të tjera të jugut si Fitore, Ferras, Poro dhe Mifol janë nën vëzhgim të shtuar, pasi prurjet e mëdha të ujit po rrezikojnë argjinaturat dhe tokat bujqësore. Sipas të dhënave nga IGJEUM, reshjet e vazhdueshme të ditëve të fundit kanë çuar në fryrje të lumenjve në disa qarqe, veçanërisht në Gjirokastër, Vlorë dhe Fier.
Strukturat vendore kanë filluar kontrollin e pikave të dobëta në argjinatura dhe janë vënë në dispozicion mjetet logjistike për evakuim në rast nevoje. Shkollat dhe institucionet publike janë njoftuar që të jenë në gatishmëri, ndërsa njësitë administrative u kërkojnë qytetarëve të ndjekin vetëm udhëzimet zyrtare dhe të raportojnë çdo problem.
Shqipëria vijon të jetë një nga vendet më të ekspozuara në Ballkan ndaj fatkeqësive natyrore, por pa një sistem real mbrojtjeje civile. Kjo është akuza që ngre Shemsi Prençi, ish-kreu i Emergjencave Civile, në një intervistë për në Syri TV.
Prençi flet për dështim të qëllimshëm nga ana e institucioneve shqiptare, që sipas tij nuk po zbatojnë as ligjet ekzistuese dhe as nuk po ndërtojnë struktura funksionale.
“Shqipëria është një vend me rrezik të lartë për shkak të pozicionit të saj gjeografik. Ne përballemi çdo vit me përmbytje, me zjarre, me rrëshqitje dherash, me ortekë dhe me bllokime rrugësh. Dhe këto nuk vijnë befas, përveç tërmetit. Të gjitha të tjerat janë të parashikueshme. Në vend që të kemi një sistem të organizuar që përgatitet për to, kemi vetëm deklarata politike dhe propagandë. Dhe kjo është shumë më e rrezikshme se vetë fatkeqësia”, tha Prençi
Ai thekson se strategjia për mbrojtjen civile është një dokument i detyrueshëm që nga viti 2015, por që qeveria e ka lënë në sirtar për më shumë se një dekadë. Sipas tij, ky nuk është më neglizhencë, por sabotim institucional.
“Ka dhjetë vjet që qeveria shqiptare është e detyruar të miratojë një strategji kombëtare për mbrojtjen civile, e cila duhet të shoqërohej me planin kombëtar, planet për çdo bashki dhe për çdo institucion përgjegjës. Dhe ne, në vitin 2026, ende flasim për ‘dokument në konsultim publik’. Kjo nuk është vonesë administrative, është sabotim i pastër. Sepse çdo ditë pa këtë strategji, jemi të pambrojtur, dhe ata që vuajnë janë qytetarët”, vijoi ai.
Banesat e tokat bujqësore në Qarkun e Lezhës vijojnë të jetë nën ujë pas përmbytjeve të shkaktuara nga fryrja e përrenjve dhe lumenjve.
Banorët shprehen se janë lënë në mëshirë të fatit pasi askush nuk ka shkuar në ndihmë të tyre. Ata i bëjnë thirrje shtetit që të dëmshpërblejë dëmet që u janë shkaktuar në banesa.
Qarku i Lezhës është përfshirë nga reshje të dendura shiu gjatë ditës së djeshme duke sjellë përmbytje në disa zona për të disatën herë në pak muaj. Uji ka përmbytur banesat, oborret e shkollave dhe bodrume pallatesh.
Në Gjadër është rritur niveli i prurjeve të lumit duke përmbytur urën që lidh fshatrat Gramsh dhe Zojz me Gjadrin teksa është ndërhyrë për pastrimin e mbeturinave që kishin bllokuar urën. Banorët e zonave të përmbytura shprehen se janë të sëmurë dhe gjithashtu i bëjnë thirrje qeverisë t’i ndihmojë.
Në Bashkinë Mirditë po punohet për largimin e inerteve nga rrugët urbane dhe ato rurale. Shkarkimet nga HEC Qafë Mollë nuk kanë nisur ende, pasi prurjet janë vlerësuar të menaxhueshme.
Sipërfaqja e tokës bujqësore nën ujë në territorin e Bashkisë Lezhë llogaritet rreth 1 010 hektarë, e shpërndarë në disa njësi administrative. Në Bashkinë Kurbin sipërfaqja e përmbytur arrin rreth 2 000 hektarë, kryesisht në zonat e Fushë Milotit, Gjormit, Mamurrasit dhe Adriatikut. Probleme me energjinë elektrike raportohen vetëm në zonat malore të Kurbinit.
Ndërkohë, aksi nacional Burrel-Rrëshen është vështirë të qarkullohet me çdo lloj mjeti për shkak të probleme të shumta. Veç amortizimit ndër vite të këtij aksi rrugor, reshjet e fundit të shiut kanë shkaktuar shembje të shkëmbinjve dhe rrëshqitje të dherave në disa segmente.
Më problematike situata paraqitet pranë urës së Urakës ku një masiv shkëmbor ka rënë në mes të rrugës. Po ashtu, në këtë segment ka edhe shembje të skarpatës së rrugës duke e ngushtuar karrexhatën vetëm me një sens lëvizje.
Prej 5 vitesh në krye të Bashkisë-Durrës, Emiriana Sako është marrë vetëm me pazare tenderësh, leje ndërtimi, leje plazhesh, kontrata qiraje, favorizime biznesesh dhe pazare me ministra e drejtorë, për t’i dhënë miliona Euro kompanisë së saj “Mectrin Motors”
Prej dy ditësh, qyteti i Durrësit, qendrat e banuara të njësive administrative, bizneset dhe tokat në të gjithë territorin e kësaj bashkie janë të përmbytura nga uji, ndërsa kryebashkiakja Emiriana Sako, e rehatuar në zyrën dhe vilën e saj, po fajëson reshjet e shiut.
E vërteta është se Durrësi vazhdon të jetë i përmbytur nga shiu, por shkaku nuk janë reshjet, por korrupsioni dhe vjedhjet që “bejleresha” e bashkisë, Emiriana Sako, i ka bërë fondeve të rrjetit të kullimit të ujërave mbi dhe nëntokësore.
Drejtuesit e SPAK-ut e dinë këtë të vërtetë, e shikojnë me sy dhe kanë shumë denoncime e kallëzime, që provojnë se gjatë pesë viteve të drejtimit të bashkisë nga Emiriana Sako, Durrësi është përmbytur edhe kur kanë rënë vetëm një orë reshje, madje edhe në stinën e verës.
Pas përmbytjes së madhe, SPAK duhej ta merrte të pandehur dhe ta arrestonte kryetaren e Bashkisë së Durrësit, Emiriana Sako, mbështetur në provën se ajo ka financuar një tender prej 20 milionë eurosh për ndërtimin e hidrovorit të ri, i cili nuk funksionon.
Nuk funksionon, sepse investimi nuk është bërë sipas projektit, ngaqë milionat janë vjedhur, në një pazar mes kryebashkiakes Emiriana Sako, që firmosi tenderin si autoritet kontraktor, dhe kompanisë private, duke e marrë në dorëzim me letra false, sikur investimi ishte kryer dhe sikur objekti funksiononte.
Provë tjetër janë 18.7 milionë euro, që kryebashkiakja Emiriana Sako ka tenderuar dhe dhënë gjatë pesë viteve në detyrë, për kolektorët dhe rrjetin e ujërave të zeza dhe të bardha, si dhe kanalizimet mbitokësore në qytetin e Durrësit dhe njësitë administrative.
Por reshjet e fundit treguan se edhe ky rrjet është jashtë funksionit dhe në disa zona mungon fare, sepse investimet nuk janë bërë dhe milionat janë vjedhur përmes raporteve false të mbikëqyrjes së punimeve dhe marrjes në dorëzim, pa u kryer investimet e plota sipas projekteve.
Provë tjetër janë tenderimet prej rreth 220 milionë eurosh, të bëra çdo vit me urdhër të Emiriana Sakos, për pastrimin e pusetave të qytetit dhe njësive administrative, por edhe këto reshje treguan se ato janë jashtë funksionit.
Prej pesë vitesh në krye të Bashkisë së Durrësit, Emiriana Sako është marrë vetëm me pazare tenderësh, leje ndërtimi, leje plazhesh, kontrata qiraje, favorizime biznesesh dhe pazare me ministra e drejtorë, për t’i dhënë miliona euro kompanisë së familjes së saj që shet dhe jep makina me qira institucioneve.
Një motiv më tepër që SPAK ta marrë të pandehur kryebashkiaken e Durrësit, Emiriana Sako, për shkaktimin e kësaj përmbytjeje, është fakti se prej muajit maj 2024 ajo është nën hetim për tenderë, leje ndërtimi dhe fonde rindërtimi, ndërsa në muajin nëntor 2025, BKH i sekuestroi telefonin, kompjuterat e saj dhe të disa drejtorëve të bashkisë.
Përmbytja e radhës, e shkaktuar nga vjedhja e fondeve të hidrovorit, kolektorëve dhe rrjetit të kanalizimeve, provon akuzat për të cilat SPAK po e heton prej një viti e gjysmë, por ndërkohë e lë të lirë të vjedhë dhe të shkaktojë dëme për qytetin, banorët dhe bizneset./Pamfleti
Qarkullimi në aksin nacional Gjirokastër-Tepelenë është paralizuar prej orësh, pas një rrëshqitjeje masive dheu dhe gurësh në afërsi të fshatit Hormovë. Pamjet nga vendngjarja tregojnë rrugën të bllokuar plotësisht, ndërsa automjetet kanë mbetur në pritje në të dy krahët e segmentit.
Radha ka arritur deri në 10 kilometra, por pavarësisht situatës së rënduar, në terren janë vetëm efektivët e Policisë Rrugore. Asnjë mjet apo punonjës i firmës koncesionare që ka detyrimin për mirëmbajtjen e këtij aksi nuk është shfaqur në vendin e ngjarjes.
Banorë dhe drejtues mjetesh shprehen të irrituar për mungesën e reagimit nga strukturat përgjegjëse. “Jemi në mes të dimrit, rruga kombëtare bllokohet dhe askush nuk vjen. Asnjë ekskavator, asnjë ndërhyrje,” tha një qytetar për mediat lokale. Kjo nuk është hera e parë që rrëshqitjet e dherave shkaktojnë ndërprerje të qarkullimit në këtë segment, ndërsa përgjegjësia institucionale mbetet në hije.
Moti i keq ka shkaktuar problematika edhe në Krujë, ku shumë fshatra janë përmbytur nga reshjet e shiut.
Situata më problematike raportohet në zonat Gramëz dhe Sukth/Vendas, Njësia Administrative Thumanë, Bashkia Krujë, ku disa banesa janë përmbytur dhe familjet kanë mbetur tërësisht të izoluara.
Mësohet se uji ka depërtuar në banesa, ndërsa bagëtitë dhe rezervat ushqimore për to janë përmbytur, duke shkaktuar dëme të konsiderueshme ekonomike dhe rrezik për jetesën e banorëve. Pavarësisht situatës emergjente, banorët denoncojnë mungesë të plotë ndërhyrjeje nga ana e bashkisë dhe strukturave të Emergjencave Civile.
Në zonë ka qenë i pranishëm edhe deputeti i Partisë Demokratike, Gent Strazimiri, i cili ka inspektuar situatën dhe ka ngritur shqetësimin për neglizhencën institucionale, mungesën e masave parandaluese dhe braktisjen e plotë të banorëve nga shteti.
“Kjo është një situatë alarmante. Nuk kemi të bëjmë me një fatkeqësi natyrore, por me një dështim total të shtetit. Asnjë interesim nga bashkia dhe as nga strukturat e emergjencave civile. Shtëpi tërësisht nën ujë, familje të izoluara, bagëti dhe ushqim bagëtish të shkatërruara. Kjo është pasojë direkte e mosveprimit dhe neglizhencës së qëllimshme të institucioneve. Banorët janë lënë në mëshirë të fatit.”, tha deputeti i PD.
Sipas dëshmisë së banorit Lekë Çypi, i cili jeton dhe punon në Itali, shkaku kryesor i përmbytjeve është mosmirëmbajtja dhe mospastrimi i rreth 300 metrave kanal kullues, i cili prej vitesh nuk është pastruar nga autoritetet përgjegjëse.
Ai shprehet se në shumë raste është detyruar ta pastrojë vetë kanalin, me shpenzime personale, gjatë pushimeve të tij në Shqipëri.
“E kam bërë vetë pastrimin, me mjetet e mia dhe me paratë e mia, por kjo nuk mund të jetë përgjegjësi e banorëve. Nuk mund ta bëj gjithmonë unë punën e bashkisë dhe të qeverisë.”, shprehet ai.
Banorët kërkojnë ndërhyrje të menjëhershme, pastrim urgjent të kanaleve kulluese dhe marrje përgjegjësie nga institucionet vendore dhe qendrore, duke theksuar se përmbytjet nuk janë pasojë e motit, por e neglizhencës së vazhdueshme.
Gjatë 24 orëve të fundit moti i keq ka shkaktuar problematika edhe në aeroportin e Rinasit.
dy nga fluturimet në ardhje të datës 5 , në orët e mbrëmjes, kanë devijuar drejt Barit, për shkak të pamundësisë për të vijuar uljen në mënyrë të sigurt.
Edhe gjatë ditës së sotme kanë pasur fenomene meteorologjike të lokalizuara në zona në afërsi të aeroportit.
Stafet e Albcontrol kanë akomoduar të gjitha kërkesat e pilotëve për të shmangur këto fenomene gjatë fazave të fluturimit. Për shkak të këtyre devijimeve të shkaktuara nga kushtet e motit, mund të ketë vonesa në fluturimet e sotme.
Albcontrol po e ndjek situatën nga afër për të garantuar ofrimin e sigurt të shërbimeve të lundrimit ajror.
Gjatë mbrëmjes, nga ora 01:30-03:30, për shkak të kushteve meteorologjike të ngarkuara kanë devijuar 5 fluturime (Bologna, Milano, Torino, Bari, Keln) për në Brindisi dhe Bari. Gjatë ditës së sotme operimet vijojnë normalisht.
Vijojnë problematikat serioze në aksin rrugor Qukës–Qafë Plloçë. Pas aksidentit të ndodhur disa orë më parë, ku një mjet u godit nga një masiv dherash në momentin e daljes nga tuneli, aktualisht po evidentohen rrëshqitje të tjera dherash, të cilat kanë bllokuar njërën prej korsive të qarkullimit.
Vetëm pak metra larg këtij vendi, rreth një muaj më parë, u shemb një masiv shkëmbor, duke detyruar autoritetet të hapin një bypass provizor.
Aktualisht, qarkullimi i mjeteve vijon vetëm në një korsi, ndërsa rrëshqitjet e dherave vazhdojnë përgjatë gjithë aksit rrugor, duke paraqitur rrezik për përdoruesit e rrugës.
Kjo është përmbytja morale e vendit. Në vend të kërkojmë shtet funksional për të gjithë, rreshtohemi si tifozë të pushtetit.
Shifrat në letër janë rritur frikshëm, po ashtu edhe buxhetet. Para të derdhura lumë, por situata me infrastrukturën në terren vazhdon të dështojë.
Rrugë që kanë kushtuar qindra milionë euro për disa kilometra të paktë çahen ose mbulohen nga dheu e gurët sapo nis dimri. Jo vetëm rrugët. Shikoni fotot e djeshme nga Durrësi. Veliera, një strukturë masive betoni, e ngritur mbi katër këmbë konstruktive, pa funksion të qartë social apo ekonomik, 12 milionë euro investim (?!) Pas një dite shiu, ishte rrafsh me ujë. Ngjante me shtratin e një lumi.
E pamundur që vepra kaq të shtrenjta të dështojnë kaq shpejt, sapo natyra i vë në provë. Përgjimet e fundit të zbardhura nga dosjet e SPAK e bëjnë gjithnjë e më të qartë arsyen. Problemi nuk është më natyra.
Kur flasim për përmbytjet do ishte e pasinqertë të përjashtohej nga përgjegjësia komuniteti. Ndërtimet pa leje, bllokimi i kanaleve kulluese, hedhja e mbetjeve në shtratin e lumenjve, tolerimi i shkeljeve nga vetë banorët. Të gjitha kanë kontribuar drejtpërdrejt në këtë situatë.
Por këto sjellje nuk lindin në vakum. Ato janë produkt i një shteti që e trajton ligjin si mall pazari. E negocion për vota, e fal kundrejt ryshfetit, e “legalizon” më pas me një firmë.
Ne shqiptarët e justifikojmë korrupsionin e vogël “poshtë” si një ves të pashmangshëm, si një zakon popullor. Por ai është reflektim i asaj që ndodh “lart”. Atje ku miliona euro kërcasin mbi kolltuqe Chesterfield duke pirë verë Romanée Conti. Prej atje zbret e përhapet babëzia. Kjo babëzi bëhet nyja që lidh më pas të gjitha hallkat e dështimit.
Në këtë “lartësi” patetikësh të privilegjuar duhet goditur fort. Po nuk u thye qafa, trupi nuk mëson të rri drejt.
Çfarë na përmbyt sot, kur alibia e vjetër “s’ka fonde” ka rënë prej kohësh? Paratë nuk mungojnë më. Përkundrazi, në infrastrukturë derdhen shifra marramendëse, të paimagjinueshme vetëm një dekadë më parë. E megjithatë, përmbytjet vazhdojnë. Atëherë, çfarë na mbyt realisht?
Na përmbyt aleanca e pushtetit me interesat e ngushta private. Kjo simbiozë e ka shndërruar territorin në mall. Mbi këtë aleancë rëndon një kulturë kolektive tolerimi ndaj shkeljes.
Humbësi është gjithmonë i njëjti, qytetari i zakonshëm, ai banori i periferisë, fermeri. Vilat rreth Teg-ut nuk mbyten. Mbytet ai që “nuk ka lidhje”. Që nuk ka zë, që nuk ka mbrojtje.
Po, është e vërtetë që shteti sot reagon pas katastrofave. Ka zyrtarë në terren, fonde emergjente, premtime për dëmshpërblim. Por kjo është vetëm administrim i dobët i pasojës. Shkaku mbetet i paprekur, sepse korrupsioni sistemik e bën të pamundur goditjen e tij.
Një shtet social dhe funksional do investonte shumë më tepër në parandalim. Shumë më pak në fasada dhe propagandë.
Meqë jemi te propaganda, dy fjalë për militantizmin e verbër partiak. Qoftë i majtë apo i djathtë, militantizmi ka pushuar së qeni bindje politike. E kanë bërë mekanizëm mbrojtës të grabitjes publike. Militanti i sotëm është kthyer në rojtar të abuzimit. Mbron fort vjedhjen nga llogorja partiake, forume, kafene, rrjete sociale.
Kjo është përmbytja më e rrezikshme nga të gjitha.
Ndërsa qeveritë, PS sot, PD dje, ndajnë miliarda euro para publike me kompanitë e tyre të lidhura, me oligarkë, koncesionarë, strategjikë e miq biznesi, baza militante angazhohet jo për të kërkuar llogari, por për të justifikuar dhe relativizuar dështimet.
Ironia tragjike është se shpesh ata që mbrojnë me fanatizëm partinë e tyre, janë pikërisht ata që e paguajnë çmimin më të lartë. U përmbyten shtëpitë, u shkatërrohen të mbjellat, bllokohen në trafikun e çmendur, aksidentohen në rrugë të dobëta, në ura të paniveluara.
Ndërkohë, miliardat janë shpërndarë, kontratat janë mbyllur dhe faturat janë firmosur.
Kjo është skema. Atje “lart” afër “majës së vetmuar” ndahet pushteti dhe fitimi, këtu “poshtë” ndahet pasoja, zemërimi dhe përçarja. Njerëzit e thjeshtë zihen për gryke për ngjyrën e partisë, ndërsa ata që kanë përfituar nga investimet fiktive dhe tenderat jo-tendera, janë bashkë. Të qetë, të dukshëm ose të padukshëm, por gjithmonë të fituar.
Militantizmi, naiv ose i paguar, u shërben si perde tymi. Çdo kritikë e cilëson “armike”, çdo pyetje e quan “sulm politik”, çdo dështim e justifikon me krahasimin me tjetrin: “Po ata më parë?”, “Pse s’flet për PD-në?”, “Pse s’flet për PS-në?” Kështu, vjedhja bëhet “kolektive” në heshtje. Përgjegjësia shpërndahet e shpërndahet aq shumë, sa përfundon të mos ketë më fajtorë.
Kjo është përmbytja morale e vendit. Në vend të kërkojmë shtet funksional për të gjithë, rreshtohemi si tifozë të pushtetit. Mbulojmë problemin me brohoritje partiake, hedhim në qarkullim idiotësi të tipit “kështu e ka gjithë bota”. E gjitha, vetëm pse fiskeku “është yni”.
Ky është ai “uji” që nuk përmbyt vetëm shtëpitë. Mbyt arsyen, mbyt solidaritetin. Banalizon idenë fisnike të interesit publik.
Stop këtij militantizmi qesharak!/Gazeta DITA
Kryeministri Edi Rama ka reaguar sërish për situatën e përmbytjeve në vend.
Këtë herë nëpërmjet një reagimi në Twitter, kryeministri ngre edhe shqetësimin e hedhjes së mbeturinave vend e pavend, duke ia vënë fajin qytetarëve.
Gjithashtu ai shton se ekipet dhe të gjitha strukturat janë në gatishmëri të plotë
"Sigurisht që kur i hedhim plehrat e shishet plastike nëpër fusha e në anët e rrugëve të atdheut që e duam vetëm në stadium, vjen një ditë shiu me gjyma që i mbledh nga janë e nga s’janë dhe i dynd në det, po kur pastaj shiu është aq i furishëm sa ky i fundit, atëherë nuk e arrin dot detin si zakonisht sepse gryka e kanalit taposet krejt, duke përmbytur dynjanë… *Shkozet", shkruan Rama.
Më parë, Rama ironizoi opozitën për akuzat ndaj tij për përmbytjet në vend, duke thënë se i ka mbetur pa kritikuar edhe për përmbytjet në shtetet e tjera të rajonit.
“Nuk e kuptoj pse nuk po më fajësojnë akoma mua, qeverinë dhe bashkinë e Durrësit, për reshjet mbytëse të këtyre ditëve në Itali, Greqi, Mal të Zi, Kroaci e me radhë… Çudi e madhe opozitat andej, po të paktën të fajësonin qeveritë e tyre, po hiç, asnjë llaf”, shkroi Rama.
Prej ditës së martë, i gjithë vendi është përfshirë nga moti i keq, që ka shkaktuar përmbytje, bllokim dhe prishje rrugësh dhe probleme të tjera për jetën e qytetarëve.
Pas banorëve të Kurbinit, një grup banorësh të zonës së Kënetës kanë protestuar ditën e sotme pasi reshjet e shiut kanë shkaktuar dëme materiale në banesat dhe bizneset e tyre.
Banorët thonë se kanalet janë të bllokuar dhe kanë 30 cm ujë në oborret dhe banesat e tyre. Më tej, ata thanë se askush nga grupet e verifikimit nuk kanë shkuar për të parë situatën nga afër.
Ata kanë bërë thirrje që të dëmshpërblehen për dëmet e shumta që kanë shkaktuar përmbytjet. Një banor shprehet se është hera e tretë që oborri i banesës është përmbytyr ndërsa kësaj here uji ka hyrë në banesë.
“Uji nuk po tërhiqet. Të heqin ujin nga rrugicat dhe nga banesat sepse demet janë shumë të mëdha. Të vijnë të na shohin sepse jemi në mëshirë të fatit. Askush nuk ka ardhur nga grupet e verifikimit për të parë situatën. Jemi te izoluar nga uji. Nuk po na ndihmon askush.”, tha një nga banorët e ish-kënetës.
Kreu i PD, Sali Berisha ka kërkuar që qeveria të shpallë gjendjen e jashtëzakonshme në qarqet e prekura nga përmbytjet.
Në një deklaratë nga selia blu, Berisha u shpreh se kryeministri Edi Rama nuk shpall gjendjen e fatkeqësisë natyrore sepse nuk do që të dëmshpërblejë mijëra familje të prekura.
“Mijëra familje shqiptare kanë pësuar pasoja shumë të rënda nga përmbytjet. Vetëm në Durrës 4 mijë banesa, biznese dhe objekte të tjera janë dëmtuar. Dëmet janë tepër të mëdha, por nuk është vetëm rasti i Durrësit.
Partia Demokratike kërkon menjëherë shpalljen e gjendjes së fatkeqësisë natyrore në këto zona. Ramaduro nëse nuk shpall gjendjen e fatkeqësisë natyrore në qarqet e prekura, e bën vetëm se ligji e detyron t’u përgjigjet një për një dëmeve të krijuara nga fatkeqësia natyrore.”, tha Berisha.
Lini një Përgjigje