FLASH
Shkruar nga Pamfleti
Shtjefën Ziçi është paraqitur këtë të hënë në Gjykatën e Shkodrës, ku do të njihet me masën e sigurisë, pasi dyshohet se vrau bashkëshorten e tij, Bardhe Ziçi, në banesën e tyre.
Ngjarja e rëndë ndodhi javën e kaluar në një banesë në Shkodër. Sipas të dhënave paraprake të hetimit, 62-vjeçari dyshohet se e qëlloi bashkëshorten me armë gjahu, duke i shkaktuar vdekjen në vend. Menjëherë pas ngjarjes, ai u arrestua nga shërbimet e Policisë.
Sipas burimeve nga grupi hetimor, pista kryesore ku janë përqendruar hetimet lidhet me konfliktet dhe xhelozinë brenda çiftit. Megjithatë, hetuesit po vijojnë veprimet për të zbardhur plotësisht motivin dhe rrethanat e krimit.
Gjykata pritet të vendosë mbi kërkesën e Prokurorisë për masën e sigurisë ndaj 62-vjeçarit, ndërsa hetimet për çështjen vazhdojnë.
Lini një Përgjigje