FLASH
Shkruar nga Pamfleti
Konflikti nisi pas një debati për pagesën e dëmit të shkaktuar nga humbja e çelësit të një biçiklete me qira.
Një konflikt i ndodhur mesditën e së dielës në parkimin e zonës turistike të Syrit të Kaltër ka përfunduar me një person të arrestuar dhe tre të tjerë të proceduar penalisht.
Sipas Policisë së Sarandës, ngjarja ka ndodhur rreth orës 12:00, pas një debati për pagesën e dëmit të shkaktuar nga humbja e çelësit të një biçiklete të marrë me qira për lëvizje brenda parkut.
Nga veprimet e para hetimore rezulton se shtetasi A. H., 43 vjeç, banues në Kamëz, dyshohet se ka goditur me sende të forta administratorin e subjektit, A. L., 27 vjeç, duke i shkaktuar fraktura. I plagosuri mori ndihmë mjekësore dhe ndodhet jashtë rrezikut për jetën.
Policia bën me dije se në konflikt dyshohet se janë përfshirë edhe A. H., 45 vjeç, vëllai i të arrestuarit, si dhe S. Ç., 20 vjeç.
Në përfundim të veprimeve të para procedurale, 43-vjeçari u arrestua në flagrancë për veprat penale "Plagosja e rëndë me dashje" dhe "Prishja e qetësisë publike".
Ndërkohë, vëllai i tij 45-vjeçar, shtetasi S. Ç. dhe administratori i subjektit, A. L., janë proceduar penalisht në gjendje të lirë për veprat penale "Plagosja e lehtë me dashje" dhe "Prishja e qetësisë publike".
Policia e Sarandës vijon hetimet për të zbardhur plotësisht rrethanat e konfliktit dhe për të përcaktuar përgjegjësitë e secilit prej personave të përfshirë.
Lini një Përgjigje