FLASH
Shkruar nga Pamfleti
Çmimet e naftës u rritën ndjeshëm të hënën në tregjet ndërkombëtare, pas rikthimit të bllokadës detare ndaj porteve iraniane dhe planit të Shteteve të Bashkuara për të vendosur tarifa kalimi për anijet që lundrojnë në Ngushticën e Hormuzit.
Nafta Brent e Detit të Veriut, me dorëzim në shtator, u rrit me 9,59%, duke mbyllur sesionin në 83,30 dollarë për fuçi.
Sipas të dhënave të tregut, një rritje kaq e madhe brenda një dite nuk ishte regjistruar as në ditët e para të shpërthimit të luftës.
Edhe nafta amerikane WTI, me dorëzim në gusht, u rrit me 9,42%, duke arritur në 78,14 dollarë për fuçi.
Analistët e Eurasia Group vlerësuan se tregjet deri tani kishin injoruar në masë të madhe sulmet ndaj lundrimit në Ngushticën e Hormuzit, por zhvillimet e fundit kanë ndryshuar situatën.
"Tregjet kishin injoruar kryesisht sulmet e fundit ndaj lundrimit në Ngushticën e Hormuzit, por shembja e kësaj paqeje të brishtë mes Uashingtonit dhe Teheranit po ndryshon tërësisht panoramën", thuhet në analizën e kompanisë.
Ngushtica e Hormuzit konsiderohet një nga korridoret më të rëndësishme energjetike në botë, pasi një pjesë e madhe e eksporteve globale të naftës kalon përmes saj. Përshkallëzimi i tensioneve në këtë zonë zakonisht reflektohet menjëherë në çmimet e energjisë në tregjet ndërkombëtare.
Lini një Përgjigje