FLASH
Shkruar nga Pamfleti
Detaje të reja janë zbardhur nga ngjarja e regjistruar në orët e para të mëngjesit të sotëm, ku një sasi tritoli shpërtheu në pjesën e jashtme të një marketi në rrugën “Ramazan Gaxherri”, në Tiranë.
Tritoli është vendosur në marketin në pronësi të shtetasit Lulëzim Lika, babai i Aldo dhe Ali Lika, të shpallur në kërkim për atentatin ndaj Kejdi Spajës, ku mbeti i plagosur polici Anxhelo Kumaraku, ngjarje e ndodhur më 18 maj.
Ngjitur me marketin ndodhet edhe një lokal i cili është në pronësi të vëllait tjetër të Lulzim Likës.
Tritol marketit si ‘hakmarrje’ pas atentatit të 18 majit në Shkozë
Ngjarja dyshohet të jetë hakmarrje e atentatit të 18 majit, megjithatë deri tani nuk dihet autori. Ai është i maskuar mirë dhe largohet nëpër rrugica në këmbë.
Në 18 Maj dy vëllezërit Aldo dhe Ali Lika dyshohet se tentuan të vrisnin me armë zjarri 31-vjeçarin Kejdi Spaja për një borxh, por aksidentalisht plagosën policin jashtë shërbimit Anxhelo Kumaraku.
Dy vëllezërit, 33 vjeç dhe 22 vjeç kishin në shënjestër Kejdi Spajën, një person, i cili ishte në arrest shtëpie, por në momentin kur ndodhi ngjarja e kishte thyer.
Ata qëlluan nga një makinë drejt 31-vjeçarit Spaja, i cili ndodhej pranë banesës së tij me efektivin Kumaraku dhe një person të tjetër me iniciale L.D.
Policia arrestoi 31- vjeçarin Spaja, pasi nga verifikimet rezultoi se kishte thyer masën e sigurisë “Arrest në shtëpi”, të caktuar nga Gjykata, për veprën penale “Armëmbajtja pa leje”. Ndërkohë dy vëllezërit janë të shpallur në kërkim.
Ndërkohë, Drejtori i Përgjithshëm i Policisë së Shtetit pezulloi menjëherë nga detyra punonjësin e Policisë, Anxhelo Kumaraku. Ndaj tij, Drejtoria e Standardeve Profesionale ka nisur hetim disiplinor.
Lini një Përgjigje