FLASH
Shkruar nga Pamfleti
Një 67-vjeçar i shpallur në kërkim ndërkombëtar për pjesëmarrje në organizatë terroriste është arretsuar nga policia në Rinas.
Mësohet se i arrestuari është një shtetas turk i identifikuar si Ibrahim Karaoglu, i cili u kap gjatë tentativës për të hyrë në Republikën e Shqipërisë përmes Pikës së Kalimit Kufitar Rinas.
Ndalimi u krye nga Njësia Rajonale Antiterrorizëm në Tiranë, në bashkëpunim me strukturat e Drejtorisë së Antiterrorit dhe autoritetet turke. Shtetasi rezultonte në kërkim ndërkombëtar për vepra që lidhen me tentativën për rrëzim të rendit kushtetues dhe pjesëmarrje në organizatë të armatosur terroriste.
Operacioni u zhvillua pas shkëmbimit të informacionit mes palëve dhe forcimit të kontrolleve në hyrje-dalje në aeroportin e Rinasit, me qëllim identifikimin e personave në kërkim që tentojnë t’i shmangen drejtësisë.
Sipas të dhënave, ndaj 67-vjeçarit ishte caktuar masa e sigurisë “arrest në burg” me qëllim ekstradimin.
"Ndalohet nga Njësia Rajonale Antiterrorizëm, Tiranë, një shtetas që kërkohej ndërkombëtarisht, për tentativë për rrëzim të rendit kushtetues dhe pjesëmarrje në organizatë të armatosur terroriste.
Shtetasi turk u ndalua gjatë tentativës për të hyrë në Republikën e Shqipërisë, nëpërmjet PKK Rinas.
Si rezultat i koordinimit të informacionit dhe veprimeve operacionale, ndërmjet specialistëve të Njësisë Rajonale Antiterrorizëm, Tiranë, në Sektorin e Hetimit në Drejtorinë e Antiterrorit, me partnerët turq, si dhe si rezultat i intensifikimit të kontrolleve dhe verifikimeve në hyrje/dalje, nga shërbimet e Policisë Kufitare të Rinasit, me objektiv parandalimin e lëvizjes ilegale, të shtetasve në kërkim ndërkombëtar, që synojnë t’i fshihen drejtësisë në shtetet ku kanë kryer vepra penale, u ndalua në hyrje të Republikës së Shqipërisë, shtetasi turk, i shpallur në kërkim ndërkombëtar:
-I. K., 67 vjeç.
Ndalimi i këtij shtetasi u krye në zbatim të urdhrit të prokurorit, nxjerrë më datë 08.08.2017, në zbatim të vendimit të Gjykatës së Rrethit Gjyqësor, Tiranë, për caktimin e masës së sigurisë “Arrest në burg”, me qëllim ekstradimin, për shtetasin I. K., për veprat penale “Tentativa për rrëzimin e rendit kushtetues” dhe “Anëtarësimi në organizatë të armatosur terroriste”, parashikuar nga legjislacioni penal turk.
Materialet procedurale iu referuan Prokurorisë pranë Gjykatës së Shkalles së Parë të Juridiksionit të Përgjithshëm Tiranë, për veprime të mëtejshme, në funksion të procedurës për ekstradimin e këtij shtetasi", njofton policia.
Lini një Përgjigje