FLASH
Shkruar nga Pamfleti
Presidenti ukrainas Volodymyr Zelensky ka përshëndetur publikisht qëndrimin e presidentit të SHBA-së, Donald Trump, lidhur me konfliktin në Ukrainë.
Reagimi i tij vjen menjëherë pas deklaratës së Trump, i cili njoftoi se do të shkurtojë ndjeshëm afatin që i kishte dhënë Moskës për të rënë dakord për një marrëveshje paqeje, nga 50 ditë në vetëm 10 deri në 12 ditë.
“Qëndrim i qartë dhe vendosmëri e shprehur nga POTUS, pikërisht në kohën e duhur, kur shumë gjëra mund të ndryshojnë përmes forcës për paqe të vërtetë,” shkroi Zelensky në një postim në rrjetin X, duke falënderuar Trump “për përqendrimin në shpëtimin e jetëve dhe ndalimin e kësaj lufte të tmerrshme”.
Kreu i stafit presidencial ukrainas, Andriy Yermak, e përforcoi këtë mesazh duke thënë se Trump po jepte një sinjal të fortë “për paqe përmes forcës”, të cilin e cilësoi si të domosdoshëm në këtë moment kritik të luftës.
Zelensky theksoi se Ukraina do të vazhdojë bashkëpunimin e ngushtë me Uashingtonin për të siguruar një të ardhme “më të sigurt, më të fortë dhe më të begatë” për të dy vendet, duke lënë të hapur mundësinë e një koordinimi të ri diplomatik me administratën Trump për përfundimin e konfliktit.
Ky zhvillim vjen në një periudhë kur retorika e Trump për një marrëveshje të shpejtë po ngjall reagime të forta ndërkombëtare, si në Moskë ashtu edhe në kryeqytetet perëndimore.
Lini një Përgjigje