FLASH
Shkruar nga Pamfleti
Zëvendëspresidenti JD Vance mbërriti në Budapest të martën në mëngjes, duke bërë që shumë rrugë të mbyllen përkohësisht rreth aeroportit dhe në kryeqytet.
Vizita e Vance ka shkaktuar jo pak probleme në aeroport. "Është kaos i plotë dhe nuk ka askush për t'i udhëhequr turistët e hutuar", raportohet në mediat hungareze. Sipas tyre pasagjerë dhe stafet e linjave ajrore janë detyruar të ecin 35 minuta në këmbë, për shkak të masave të sigurisë, që pengonin lëvizjen e mjeteve.
Vance do të niset të mërkurën, kështu që mbyllje të ngjashme janë të mundshme. BKK tha të hënën se kufizimet e trafikut duhet të priten në zonën përreth Aeroportit Ndërkombëtar Liszt Ferenc midis orës 10:00 dhe 11:00 të së martës, më 7 prill, dhe midis orës 11:00 dhe 12:00 të së mërkurës, më 8 prill.
BKK u kërkon të gjithë atyre që kanë aeroplanin që do të niset gjatë kësaj periudhe, të largohen nga shtëpia shumë më herët.
Nënpresidenti amerikan JD Vance vizitoi Hungarinë për të mbështetur Viktor Orbanin përpara zgjedhjeve.
Udhëtimi i nënpresidentit amerikan JD Vance tregon qartë se Rusia nuk është i vetmi vend i interesuar për një fitore të liderit hungarez Viktor Orban.
Pas 16 vitesh në pushtet, kryeministri i Hungarisë Viktor Orban po përpiqet të ruajë pozitat, ndërsa partia e tij në qeveri, Fidesz, rezulton ndjeshëm pas në shumicën e sondazheve. Tani, nënpresidenti Vance po ndërmerr një përpjekje të fundit për të ringjallur perspektivat e zbehura të një prej figurave kryesore të nacionalizmit në Evropë.
Vance vizitoi Budapestin, kryeqytetin e vendit, të martën, vetëm pak ditë përpara zgjedhjeve të së dielës, me qëllim nxitjen e votuesve që të mbështesin Orbanin. Vizita e tij thekson se sa e rëndësishme është kjo zgjedhje në një vend të vogël me ekonomi modeste për vende përtej kufijve të tij.
Si administrata Trump ashtu edhe Moska e shohin Orbanin si një element kyç në kundërshtimin e tyre të përbashkët ndaj Evropës dhe shpresojnë që sondazhet të jenë të gabuara. Bashkimi Evropian, i cili prej kohësh është penguar nga qëndrimet e Hungarisë për çështje kyçe si lufta në Ukrainë, shpreson që sondazhet të jenë të sakta, por nuk e shpreh këtë publikisht për të mos i dhënë Orbanit argumente në retorikën e tij kundër BE-së.
Për Presidentin Trump, Orban përfaqëson një figurë të qëndrueshme evropiane kundër politikave liberale që lëvizja e tij MAGA i kundërshton, si dhe një faktor që sfidon Bashkimin Evropian.
Për Presidentin rus Vladimir Putin, Orban ka qenë thelbësor në pengimin e sanksioneve të BE-së dhe në vonimin e kredive shumë miliardë dollarëshe për Ukrainën, të destinuara për mbrojtjen e saj në luftën katërvjeçare kundër Rusisë. Moska nuk e ka fshehur bashkëpunimin me qeverinë e Orbanit.
Orban e ka vendosur qëndrimin armiqësor ndaj Ukrainës në qendër të fushatës së tij për rizgjedhje, duke paraqitur partinë Fidesz si të vetmen garanci për sigurinë përballë asaj që ai e përshkruan si kërcënime nga fqinji lindor i Hungarisë.
Vance, i cili prej kohësh ka sfiduar rrymën kryesore politike në Evropë duke mbështetur të djathtën nacionaliste, u përfshi në fazën përfundimtare të një fushate zgjedhore të tensionuar në Hungari me një mesazh mbështetjeje për Fidesz.
Lini një Përgjigje