FLASH
Shkruar nga Pamfleti
Zhvillimet në çështjen e “ndihmës ndaj armikut”, që përfshin “persona të rangut të lartë”, kanë tronditur Izraelin.
Drejtësia izraelite ngriti sot akuza, ndër të tjera për “ndihmë ndaj armikut në kohë lufte”, ndaj Bezalel Zini, vëllai i kreut të shërbimit të sigurisë së brendshme të Izraelit (Shin Bet), David Zini.
Çështja lidhet me një rrjet të madh kontrabande të produkteve të ndryshme drejt Hamasit në Rripin e Gazës, njoftoi prokuroria.
Bezalel Zini dhe dy të dyshuar të tjerë ndiqen penalisht gjithashtu, sipas aktakuzës, për kontrabandë “të organizuar, sistematike dhe të sofistikuar” të produkteve drejt territorit palestinez që nga qershori i vitit 2025, gjatë luftës së vazhdueshme mes Izraelit dhe Hamasit.
Tre burrat dyshohen se kanë kontrabanduar produkte si kuti cigaresh, telefona celularë, panele diellore dhe pjesë këmbimi automjetesh, duke “mashtruar ushtarë në pikat e kontrollit në Rripin e Gazës dhe duke pretenduar në mënyrë të rreme se po hynin në kuadër të shërbimit të tyre ushtarak për arsye sigurie”.
Në periudhën kur dyshohet se janë kryer veprat penale, Zini, rezervist, ishte komandant i një njësie inxhinierësh civilë në Gaza.
Vëllai i tij, gjenerali David Zini, mori drejtimin e Shin Bet-it në tetor të vitit 2025.
Sipas prokurorisë, Bezalel Zini dhe të pandehurit e tjerë “e dinin mundësinë që produktet e ndaluara të përfundonin te Hamasi dhe anëtarët e tij, si dhe probabilitetin e lartë që kjo të ndihmonte armikun në luftën e tij kundër Izraelit”.
Deri tani, akuza janë ngritur ndaj 12 izraelitëve dhe një kompanie në lidhje me këtë çështje.
Lini një Përgjigje