FLASH
Shkruar nga Pamfleti
Trump theksoi se pasojat e këtij veprimi do të bëhen të qarta së shpejti...
Presidenti i SHBA-së, Donald Trump, ka përsëritur ultimatumin në lidhje me sulmin ndaj termocentraleve në Republikën Islamike. Në një intervistë për televizionin izraelit ‘13 News", Trump theksoi se pasojat e këtij veprimi do të bëhen të qarta së shpejti, teksa paralajmëroi regjimin në Teheran se ato do të jenë të tmerrshme.
"Së shpejti do të zbuloni se çfarë do të ndodhë me ultimatumin mbi termocentralet, rezultati do të jetë shumë i mirë. Do të ketë shkatërrim total të Iranit dhe do të funksionojë shkëlqyeshëm", tha Trump.
Presidenti amerikan nuk la pa kritikuar ashpër aleancën e NATO-s dhe sjelljen e saj ndaj regjimit në Teheran gjatë dekadave. Ai deklaroi për median izraelite se sjellja e vendeve të NATO-së ishte një turp i madh.
"Vendet e NATO-s nuk po bëjnë asgjë, është një turp i madh. Irani ka qenë shumë i keq për 47 vjet. Tani po merr ndëshkimin e merituar", shtoi Trump.
Më herët sot, Garda Revolucionare njoftoi se do ta mbyllte plotësisht Ngushticën e Hormuzit nëse Presidenti i SHBA-së Donald Trump i zbaton kërcënimet e tij për të sulmuar objektet energjetike të Iranit.
Komentet vijnë pasi Trump kërcënoi të "shkatërrojë" termocentralet e Republikës Islamike nëse Teherani nuk e rihap ngushticën brenda 48 orëve.
"Nëse Irani nuk e hap plotësisht, pa kërcënim, Ngushticën e Hormuzit brenda 48 orësh - SHBA-të do të sulmojnë dhe shkatërrojnë termocentralet e saj të ndryshme, duke filluar nga më i madhi i pari", shkroi Trump në “TruthSocial”.
Teherani iu përgjigj shpejt ultimatumit amerikan. Kryetari i parlamentit iranian, Mohammad Baqer Qalibaf, sulmoi Trumpin, duke pretenduar se nuk e kuptonte natyrën e konfliktit.
"Nuk jam i sigurt nëse nuk keni ide se kë po luftoni apo nëse thjesht po përpiqeni të kërcënoni. Nëse mendoni se mund t'i mposhtni në këtë mënyrë, jeni shumë naivë", shkroi Qalibaf.
Në një deklaratë zyrtare, Garda Revolucionare sqaroi se në rast të një sulmi amerikan, kompanitë në rajon në të cilat SHBA-të kanë aksione do të shkatërrohen plotësisht. Gjithashtu u tha se objektet energjetike në vendet e rajonit ku ekzistojnë bazat amerikane do të bëhen "objektiva legjitime" për një sulm iranian.
Lini një Përgjigje