FLASH
Shkruar nga Pamfleti
Kryeministri i Sllovakisë, Robert Fico, i ka kërkuar operatorit të rrjetit elektrik të vendit që të ndërpresë furnizimin me energji elektrike për Ukrainën, nëse nuk rifillon rrjedha e naftës përmes tubacionit Druzhba.
“Duke filluar nga sot, nëse pala ukrainase i drejtohet Sllovakisë për ndihmë në stabilizimin e rrjetit energjetik të Ukrainës, ajo nuk do ta marrë një ndihmë të tillë”, deklaroi Fico.
Ai shtoi se masa do të hiqet sapo të rifillojnë furnizimet me naftë drejt Sllovakisë.
Sipas mediave ndërkombëtare, fluksi i naftës ruse drejt Sllovakisë është ndërprerë prej afro një muaji. Të shtunën e kaluar, Fico paralajmëroi se do të ndërpriste furnizimin emergjent me energji elektrike për Ukrainën, duke i dhënë Kievit një afat dy-ditor për të rikthyer pompimin e naftës ruse përmes territorit ukrainas.
Tubacioni Druzhba, i ndërtuar gjatë epokës sovjetike, mbetet një nga linjat kryesore të furnizimit me naftë në Evropën Qendrore dhe kalon përmes territorit të Ukrainës.
Sllovakia dhe Hungaria janë dy vendet e vetme të Bashkimit Evropian që vazhdojnë të varen në mënyrë të konsiderueshme nga nafta ruse e transportuar përmes Druzhba-s.
Të dyja vendet drejtohen nga qeveri që kanë mbajtur marrëdhënie të afërta me Moskën, pavarësisht anëtarësimit në BE, dhe shpesh janë përplasur me Brukselin për qëndrimet e tyre lidhur me Rusinë dhe politikat energjetike.
Nuk e di pse e shperdoroni kohen me Shoqaten e Beqirave!