FLASH
Shkruar nga Pamfleti
Të paktën tetë nxënës dhe një mësues kanë humbur jetën, ndërsa disa të tjerë janë plagosur si pasojë e një sulmi me armë në një shkollë në jug të Turqisë, sipas ministrit të Brendshëm, Mustafa Çifçi.
Ngjarja ka ndodhur në shkollën e mesme “Ayser Çalik” në zonën e Kahramanmaraşit, ku, sipas autoriteteve, 13 persona janë plagosur, gjashtë prej tyre në gjendje kritike.
Autori i dyshuar, një 14-vjeçar dhe nxënës i kësaj shkolle, ka mbetur gjithashtu i vrarë. Ai dyshohet se ka hyrë në dy klasa i armatosur me pesë armë dhe shtatë karikatorë. Sipas guvernatorit lokal Mukerrem Ünlüer, armët i përkisnin babait të tij, një ish-oficer policie, i cili është vënë në pranga.
Motivi i sulmit të ndodhur të mërkurën mbetet ende i panjohur, ndërsa autoritetet kanë nisur hetimet. Në disa pamje të publikuara, shihen persona që hidhen nga dritaret e katit të parë dhe largohen me vrap nga ambientet e shkollës gjatë momentit të të shtënave.
“Zhurma e armëve ishte shumë e fortë,” është shprehur një gazetar, duke përshkruar gjithashtu situatën e panikut jashtë shkollës. Pas përhapjes së lajmit, prindër të shumtë u mblodhën të shqetësuar përpara ndërtesës.
“Fëmija im e pa gjithçka dhe më tha: ‘Babi, shoku im u plagos’,” ka rrëfyer një prind për AFP, duke shtuar: “Si do t’i çoj sërish fëmijët e mi në këtë shkollë?”
Presidenti turk Recep Tayyip Erdogan ka reaguar përmes një postimi në rrjetin X, duke u uruar “shërim të shpejtë fëmijëve, familjeve dhe mësuesve”.
Ngjarja vjen vetëm një ditë pas një tjetër incidenti të ngjashëm në jug të vendit, ku 16 persona u plagosën kur një ish-nxënës hapi zjarr në një shkollë të mesme, përpara se të vriste veten.
Lini një Përgjigje