FLASH
Shkruar nga Pamfleti
Një avion i kompanisë gjermane Lufthansa, me 205 persona në bord, mbeti pa pilot për rreth 10 minuta vitin e kaluar, pasi bashkëpiloti humbi ndjenjat ndërsa ndodhej i vetëm në kabinë; ngjarja është zbuluar në një raport të ri të autoritetit spanjoll të hetimit të aksidenteve ajrore.
Incidenti ndodhi më 17 shkurt 2024, gjatë një fluturimi nga Frankfurti drejt Seviljes, kur kapiteni kishte dalë për të përdorur tualetin. Pikërisht në atë moment, bashkëpiloti humbi ndjenjat, duke lënë avionin pa mbikëqyrje njerëzore. Në bord ndodheshin 199 pasagjerë dhe gjashtë anëtarë ekuipazhi. Fatmirësisht, autopiloti ishte aktiv dhe e mbajti avionin në fluturim të qëndrueshëm, edhe pse bashkëpiloti, pa vetëdije, ndërveproi me kontrollet e fluturimit.
Raporti tregon se kontrollori i trafikut ajror tentoi disa herë të kontaktonte me kabinën, por pa sukses. Kapiteni tentoi të futej në kabinë me kodin standard të sigurisë, por pa përgjigje. Pas disa përpjekjesh dhe një telefonate përmes sistemit interkom, ai përdori një kod emergjence për të hyrë dhe mori menjëherë kontrollin e avionit.
Bashkëpiloti mori ndihmë të parë nga ekuipazhi dhe një mjek pasagjer, dhe pas pak minutash rifitoi vetëdijen. Më pas, fluturimi u devijua në aeroportin Adolfo Suárez Madrid-Barajas, ku u ul rreth 20 minuta më vonë. Bashkëpiloti u transportua në spital dhe qëndroi nën kujdes mjekësor për disa orë.
Hetimi zbuloi se humbja e ndjenjave ishte pasojë e një gjendjeje neurologjike të mëparshme, për të cilën bashkëpiloti nuk kishte dijeni dhe që nuk ishte konstatuar gjatë ekzaminimeve mjekësore të detyrueshme. Për pasojë, certifikata e tij mjekësore u pezullua.
Autoriteti spanjoll e përshkroi rastin si një “rrethanë të jashtëzakonshme” dhe theksoi se kapitenët trajnohen për të menaxhuar situata kur një nga pilotët bëhet i paaftë. Sipas CIAIAC, gjatë viteve 2019-2024 janë regjistruar 287 raste të paaftësisë së pilotëve gjatë fluturimeve në bazën e të dhënave të Komisionit Evropian.
Ndërkohë, CNN i është drejtuar Lufthansas për koment. Kompania ka konfirmuar për agjencinë gjermane të lajmeve DPA se është në dijeni të ngjarjes dhe se ka zhvilluar një hetim të brendshëm, por nuk ka bërë publike rezultatet.
Lini një Përgjigje