FLASH
Shkruar nga Pamfleti
Disa ishuj të vegjël iranianë në Gjirin Persik mund të marrin rëndësi strategjike në rast se Shtetet e Bashkuara vendosin të rrisin presionin ndaj Iranit, duke përfshirë edhe opsione ushtarake tokësor, sipas analistit Tim Lister.
Tre kontingjente të Marinës së SHBA-së janë dislokuar në rajon, megjithëse Presidenti Donald Trump ka deklaruar se nuk ka ndërmend të vendosë trupa në terren.
“Nuk do të vendosja trupa askund”, u tha ai gazetarëve, duke shtuar se nëse do ta konsideronte një veprim të tillë, nuk do ta bënte publik.
Megjithëse disa nga këta ishuj janë shumë të vegjël dhe me sipërfaqe të kufizuar, pozicioni i tyre pranë rrugëve kryesore detare u jep rëndësi të veçantë strategjike. Ishulli Kharg veçohet për peshën e tij ekonomike, pasi përmes tij kalon mbi 90% e eksporteve të naftës së Iranit.
Sipas analizës, forcat amerikane kanë kryer më herët sulme intensive ndaj pozicioneve ushtarake në Kharg, duke theksuar rëndësinë e këtij objekti në infrastrukturën energjetike iraniane.
Autoritetet iraniane kanë paralajmëruar kundër çdo sulmi të mundshëm ndaj ishujve të tyre. Shtabi ushtarak në Teheran ka kërcënuar me kundërpërgjigje ndaj Emirateve të Bashkuara Arabe në rast të një sulmi ndaj ishujve Abu Musa dhe Tunb i Madh. Këta ishuj, së bashku me Tunb të Vogël, ndodhen pranë Ngushticës së Hormuzit, një korridor kyç për transportin global të energjisë.
Kontesti për këta ishuj daton që nga viti 1971, kur Irani mori kontrollin mbi Tunb-et pak para krijimit të Emirateve të Bashkuara Arabe. Emiratet kanë kërkuar vazhdimisht kthimin e tyre.
Sipas kreut të Marinës së Gardës Revolucionare Islamike, Alireza Tangsiri, ishujt iranianë në Gjirin Persik përbëjnë “fortesa të fortifikuara”. Ai ka deklaruar se çdo veprim armiqësor do të përballet me një përgjigje vendimtare.
Lini një Përgjigje