FLASH
Shkruar nga Pamfleti
Meloni-Macron: Takim vendimtar në Romë për një Evropë më të fortë dhe më sovrane...
Në një moment të rëndësishëm për skenën politike evropiane, Kryeministrja italiane Giorgia Meloni priti sot në Palazzo Chigi Presidentin francez Emmanuel Macron për një takim dypalësh të nivelit të lartë, të parin zyrtar në Itali mes tyre. Në qendër të diskutimeve ishin tema të nxehta si konkurrueshmëria, mbrojtja, forcimi i lidhjeve transatlantike dhe lufta kundër imigracionit të parregullt – me qëllimin e përbashkët për të ndërtuar një “Evropë më të sovrane, më të fortë dhe më të begatë.”
Takimi vjen pas një periudhe tensioni e ftohjesh diplomatike midis dy liderëve, duke sinjalizuar dëshirën për një rifillim të dialogut midis Romës dhe Parisit. Në tryezën e bisedimeve ishte edhe çështja kyçe e hartimit të kuadrit financiar shumëvjeçar të BE-së dhe burimeve të nevojshme për të financuar prioritetet strategjike të bllokut. U diskutua ideja e një kombinimi midis investimeve private dhe fondeve të përbashkëta evropiane, për të përballuar sfidat e së ardhmes.
Takimi u zhvillua në prag të zhvillimeve të fundit gjeopolitike, veçanërisht bisedimeve në Stamboll mes Ukrainës dhe Rusisë, duke i dhënë mundësi dy liderëve të riafirmonin mbështetjen e “palëkundur” të Italisë dhe Francës për Ukrainën dhe përpjekjet për një zgjidhje të drejtë dhe të qëndrueshme të konfliktit. Në agjendë ishte gjithashtu kriza në Lindjen e Mesme, situata në Libi dhe koordinimi për stabilitetin dhe sigurinë në zonën e Mesdheut.
Marrëdhënie të ndërlikuara, midis rivalitetit dhe domosdoshmërisë strategjike
Historikisht, marrëdhëniet franko-italiane kanë kaluar periudha të alternuara bashkëpunimi dhe rivaliteti. Me ardhjen në pushtet të Giorgia Melonit më 22 tetor 2022, u shtua një faktor i ri në këtë balancë delikate diplomatike. Edhe pse divergjencat politike midis Melonit dhe Macronit janë të dukshme – me qëndrime diametralisht të kundërta në çështje si migracioni, aborti, dhe politikat sociale – dinamika gjeopolitike e Evropës i ka detyruar të dy palët të mbajnë një dialog pragmatik.
Takimi i tyre i parë ndodhi vetëm një ditë pas betimit të qeverisë Meloni, në tetor 2022, në një takim të fshehtë në Romë. Macron ishte kreu i parë shtetëror që e takoi Melonin, dhe që atëherë janë zhvilluar disa takime, me alternime mes distensionit dhe tensionit.
Në mars 2023, në Bruksel, pati një përpjekje për një “reset” personal e politik mes tyre. Në qershor 2023, takimi në Elize u fokusua në krizën e migracionit dhe Ukrainën, ndërsa në shtator 2023 u zhvillua një tjetër takim në Palazzo Chigi, sërish pa delegacione, ku dominonte tema e emigracionit.
Përplasja më e fortë: G7 dhe debati për abortin
Gjatë samitit të G7 në Puglia në qershor 2024, marrëdhëniet mes tyre arritën në një pikë të ftohtë. Macron kritikoi mungesën e fjalës “abort” në deklaratën përfundimtare të samitit, ndërsa Meloni e quajti të papërshtatshëm përdorimin e G7 për debate elektorale të brendshme. Ky incident thelloi ndasitë mes tyre dhe çoi në muaj të tërë heshtjeje.
Vetëm më 2 gusht 2024 ata u rikthyen në dialog, në një takim informal në Versailles, gjatë Lojërave Olimpike, që u përshkrua si “shumë pozitiv” nga Macron. Por në Tiranë ata patën një tjetër përplasje. Trump pati në bisedë telefonike me liderët e BE, por Meloni u la jashtë dhe kjo soli përplasje mes kryeministres italiane dhe Macron.
Lini një Përgjigje