FLASH
Shkruar nga Pamfleti
Komisioni Qendror i Zgjedhjeve në Rumani i ka ndaluar sot kandidatit prorus të ekstremit të djathtë, Calin Georgescu, pjesëmarrjen në zgjedhjet presidenciale që do të rimbahen në maj, pasi zgjedhjet e nëntorit u anuluan pas fitores së tij në rundin e parë.
Refuzimi i kandidaturës së tij, i dënuar nga liderët e partive të ekstremit të djathtë si jodemokratik, mund të shkojë në Gjykatën Kushtetuese.
Dhjetëra mbështetës të populistit Georgescu u mblodhën jashtë zyrës zgjedhore duke brohoritur “Liri”, ndërsa për pak tentuan të kalonin kordonin e sigurisë.
Georgescu dorëzoi kandidaturën e tij për raundin e përsëritur të votimit të majit të premten, mes dyshimeve se nuk do t’i lejohej të garonte.
Gjykata më e lartë e Rumanisë anuloi votimin dy ditë përpara raundit të dytë në dhjetor, duke përmendur akuzat për ndërhyrje ruse në favor të Georgescut, të cilat Moska i ka mohuar.
Anëtarë të administratës së Presidentit të SHBA-së, Donald Trump, e cilësuan anulimin e zgjedhjeve në Rumani si një shembull të qeverive evropiane që shtypin lirinë e fjalës dhe kundërshtarët politikë. Ndërsa miliarderi i teknologjisë dhe këshilltari i Trumpit, Elon Musk, e cilësoi vendimin si “të çmendur”.
Georgescu është nën hetim penal për gjashtë akuza, duke përfshirë anëtarësimin në një organizatë fashiste dhe shpërndarjen e informacioneve të rreme mbi financimin e fushatës, ndërsa ai ka mohuar të gjitha akuzat.
Lini një Përgjigje