FLASH
Shkruar nga Pamfleti
Demonstruesit në të gjithë Shtetet e Bashkuara të Amerikës (SHBA) po kërkojnë që të mos ketë "punë, shkollë, pazar" si pjesë e një greve kombëtare të organizuar sot si shenjë kundërshtimi ndaj operacioneve anti-emigrante të administratës së Presidentit të SHBA-së, Donald Trump.
Protestat vijnë pasi agjentët e agjencisë federale të Imigracionit dhe Doganave, e njohur si ICE, vranë Alex Pretty, një mjek të urgjencës, i cili u qëllua disa herë ndërsa filmonte agjentët e Patrullës Kufitare duke kryer një bastisje anti-imigrantësh në Minneapolis.
Vetëm pak javë më parë, më 7 janar, agjentët e ICE-së, gjithashtu në Minneapolis, vranë një shtetase tjetër amerikane, Renee Goode, ndërsa ajo ishte pas timonit të makinës së saj. Dhe vdekja e saj ndodhi gjatë zbatimit të operacionit anti-imigrant.
Të dyja vrasjet shkaktuan zemërim dhe indinjatë ndaj taktikave anti-emigrante të administratës Trump.
"Banorët e qyteteve binjake (Minneapolis dhe St. Paul, Minnesota) i kanë treguar rrugën të gjithë vendit për të ndaluar mbretërimin e terrorit të ICE-së, duhet ta mbyllim atë", thuhet në njërën nga shumë faqet e internetit dhe mediat sociale që promovojnë veprimin civil të sotëm në të gjithë SHBA-në.
Shumë kompani kanë njoftuar se nuk do të punojnë gjatë “blackout”-it të sotëm, pra grevës. Disa shkolla në Arizona dhe Kolorado anuluan mësimet si masë paraprake, duke pritur mungesa masive.
Janë planifikuar tubime të studentëve dhe qytetarëve në qendrat e qyteteve, në objektet e vetëqeverisjes lokale dhe në kisha në të gjithë vendin.
Në Michigan, në qytetin e Birminghamit, në veri të Detroitit, dhjetëra nxënës braktisën mësimin. Kolona e tyre sfidoi dimrin e acartë dhe në rrugën prej rreth një kilometri drejt zonës më të afërt të biznesit, ajo u shoqërua nga boritë e makinave.
Në Maine, ku senatorja republikane Susan Collins njoftoi dje fundin e operacioneve të gjera të ICE-së në shtetin verilindor, njerëz u mblodhën jashtë një kishe në Portland me slogane kundër agjentëve federalë të imigracionit.
Kryetari i bashkisë së Portlandit, demokrati Mark Dion, foli gjithashtu në tubim.
"Mosmarrëveshja është një gjë demokratike. Mosmarrëveshja është një gjë amerikane. Është gurthemeli i demokracisë sonë", i tha Dion turmës.
Lini një Përgjigje