FLASH
Shkruar nga Pamfleti
Kryeministri i Pakistanit, Shehbaz Sharif, ka bërë thirrje për ulje të tensioneve në Lindjen e Mesme, pas shkëmbimit të sulmeve ajrore mes Izraelit dhe Iranit, duke paralajmëruar se përshkallëzimi i konfliktit mund të rrezikojë përpjekjet për një marrëveshje të qëndrueshme paqeje.
Në një reagim të publikuar në platformën X, Sharif theksoi se zhvillimet e fundit tregojnë sa i brishtë mbetet armëpushimi i arritur më herët dhe sa të rënda mund të jenë pasojat e rikthimit të dhunës.
“Rritja e fundit e dhunës në Lindjen e Mesme është një kujtesë e fortë e rreziqeve që lidhen me një armëpushim të brishtë dhe pasojat e padurueshme që mund të sjellë ai”, shkroi kryeministri pakistanez.
Pakistani ka luajtur një rol aktiv diplomatik në komunikimin mes Shteteve të Bashkuara dhe Iranit, duke u konsideruar një nga ndërmjetësit kryesorë në arritjen e armëpushimit të përkohshëm të muajit prill.
Teksa iu referuar negociatave që po zhvillohen për ta kthyer armëpushimin në një marrëveshje afatgjatë paqeje, Sharif u shpreh optimist se palët janë pranë një zgjidhjeje.
“Ndërsa punojmë me zell dhe me shumë mund, së bashku me vëllezërit dhe partnerët tanë, për të gjetur një zgjidhje paqësore diplomatike për konfliktin, dhe veçanërisht kur objektivi përfundimtar është gati të arrihet, ne i nxisim sinqerisht të gjitha palët të ushtrojnë përmbajtje dhe t'i japin paqes pak më shumë shanse”, deklaroi ai.
Sharif shtoi se diplomacia mbetet alternativa më e mirë për zgjidhjen e krizës, duke theksuar se ende ekzistojnë mundësi reale për sukses përmes dialogut dhe jo përmes përshkallëzimit ushtarak.
Lini një Përgjigje