FLASH
Shkruar nga Pamfleti
Vatikani ka reaguar pas sulmeve të presidentit Donald Trump kundrejt Papa Leone XIV. Në një postim në X, prifti Antonio Spadaro shkruan se Papa flet një gjuhë tjetër nga ajo e politikanëve.
“Donald Trump synon Papa Leone XIV dhe në këtë mënyrë zbulon një shqetësim më të thellë. Kur pushteti politik kthehet kundër një zëri moral, shpesh kjo ndodh sepse nuk mund ta përballojë atë. Trump nuk e diskuton Leonen; ai i lutet të kthehet në një gjuhë që ai mund ta kontrollojë. Por Papa flet një gjuhë tjetër, që nuk mund të shndërrohet në gramatikën e forcës, sigurisë apo interesit kombëtar.
Në këtë kuptim, sulmi është një deklaratë impotence. I paaftë për të përthithur atë zë, pushteti përpiqet ta delegjitimojë atë. Megjithatë, duke vepruar kështu, ai pranon në mënyrë të nënkuptuar peshën e tij. Nëse Leone do të ishte i parëndësishëm, nuk do të meritonte asnjë fjalë. Përkundrazi, ai përmendet, emërohet, kundërshtohet, një shenjë se fjalët e tij kanë rëndësi.
Këtu shfaqet forca morale e Kishës. Jo si një kundërfuqi, por si një hapësirë në të cilën pushteti gjykohet nga një standard që nuk e kontrollon. Leone nuk përgjigjet në terrenin e polemikës dhe pikërisht për këtë arsye mbetet jashtë mundësive të saj. Ai është i lirë. Dhe kjo liri, e paarmatosur dhe çarmatosëse është ndoshta ajo që shqetëson më shumë. Njëkohësisht, ajo që ka më shumë rëndësi”, shkruan Antonio Spadaro.
Vetë Papa Leo deklaroi për Reutersse planifikon të vazhdojë të shprehet kundër luftës, pas një sulmi të drejtpërdrejtë nga presidenti amerikan Donald Trump ndaj kreut të Kishës me 1.4 miliardë besimtarë.
Në komentet e bëra në bordin e avionit drejt Algjerit, ku ai po nis një tur 10-ditor në katër vende afrikane, Papa theksoi gjithashtu se mesazhi i krishterë po “keqpërdoret”.
“Do të vazhdoj të flas fort kundër luftës, duke kërkuar të promovoj paqen, dialogun dhe marrëdhëniet shumëpalëshe mes shteteve për të gjetur zgjidhje të drejta për problemet. Shumë njerëz po vuajnë sot në botë,” shtoi Papa.
Lini një Përgjigje