FLASH
Shkruar nga Diplomatico | Pamfleti.net
European Jewish Congress denoncon sulmin ndaj objektit hebraik në Shkup, ndërsa kërkohet reagim i menjëhershëm i autoriteteve për të ndalur përshkallëzimin e urrejtjes...
Një ngjarje e rëndë ka tronditur Shkupin dhe ka ngritur alarmin për një klimë gjithnjë e më të rrezikshme të urrejtjes fetare dhe etnike në rajon. Hyrja e godinës së Bashkësisë Hebraike dhe sinagogës në kryeqytetin e Maqedonisë së Veriut është bërë objekt i një sulmi me zjarr, që sipas European Jewish Congress u krye në orët e para të mëngjesit nga dy persona, të cilët i vunë flakën derës dhe më pas u larguan. Policia po heton rastin, ndërsa masat e sigurisë janë shtuar.
Bashkësia Hebraike në Maqedoni e ka dënuar ashpër incidentin, duke theksuar se nuk bëhet fjalë thjesht për një sulm ndaj një objekti fetar, por për një goditje të drejtpërdrejtë ndaj bashkëjetesës, dinjitetit dhe respektit të ndërsjellë. Në deklarimin e saj publik, komuniteti hebraik ka shprehur shqetësim për rritjen e gjuhës së urrejtjes, intolerancës dhe identifikimit të padrejtë të hebrenjve me zhvillimet gjeopolitike në Lindjen e Mesme.
Ky është pikërisht thelbi i alarmit: kur një konflikt i largët përkthehet në urrejtje lokale, shoqëria hyn në një terren të rrezikshëm. Sulmi në Shkup nuk mund të relativizohet si akt vandal apo si shpërthim i izoluar. Ai prek drejtpërdrejt sigurinë e një komuniteti, por edhe aftësinë e shtetit për të garantuar rendin demokratik dhe mbrojtjen e lirive fetare. EJC e quajti incidentin dëshmi të cenueshmërisë së vazhdueshme të objekteve hebraike në Europë, ku vendet e kultit dhe jetës komunitare mbeten nën rrezik.
Tani vëmendja është te institucionet e Maqedonisë së Veriut. Hetimi duhet të jetë i shpejtë, i thellë dhe me pasoja konkrete për autorët. Çdo vonesë, çdo relativizim dhe çdo heshtje institucionale do të lexohej si dobësi përballë antisemitizmit. Në raste të tilla, shteti nuk testohet vetëm për aftësinë për të kapur autorët, por për vendosmërinë për të mbrojtur vetë idenë e bashkëjetesës.
Në një Ballkan që vazhdon të mbajë plagë të hapura nga nacionalizmat, ekstremizmat dhe instrumentalizimi politik i identiteteve, një sulm i tillë nuk është thjesht kronikë e zezë. Është kambanë alarmi. Dhe pikërisht për këtë arsye, reagimi ndaj tij duhet të jetë i prerë: zero tolerancë ndaj antisemitizmit, zero hapësirë për urrejtjen./Pamfleti
Lini një Përgjigje