FLASH
Shkruar nga Pamfleti
Buckingham Palace ka deklaruar se është i gatshëm të ndihmojë Policinë e Thames Valley në vlerësimin e akuzave të reja ndaj Andrew Mountbatten-Windsor, në lidhje me marrëdhëniet e tij me financierin Jeffrey Epstein.
Autoritetet policore po shqyrtojnë pretendimet sipas të cilave Andrew, gjatë kohës që shërbente si i dërguar tregtar i Mbretërisë së Bashkuar, ka ndarë dokumente konfidenciale me Epstein. Andrew Mountbatten-Windsor i ka mohuar vazhdimisht çdo akuzë për keqbërje në lidhje me Epstein.
Në një deklaratë zyrtare, Pallati Mbretëror theksoi se mbreti ka shprehur qartë shqetësimin e tij për akuzat që vazhdojnë të dalin në dritë. “Mbreti e ka bërë të qartë, si me fjalë ashtu edhe përmes veprimeve të paprecedenta, shqetësimin e tij të thellë lidhur me akuzat që vazhdojnë të shfaqen për sjelljen e zotit Mountbatten-Windsor,” thuhet në deklaratë.
Pallati sqaroi gjithashtu se, ndonëse pretendimet konkrete janë çështje që duhet të adresohen personalisht nga Andrew Mountbatten-Windsor, institucioni mbretëror është i gatshëm të bashkëpunojë me policinë nëse kjo kërkohet. “Nëse na kontakton Policia e Thames Valley, ne jemi të gatshëm të ofrojmë mbështetjen tonë, ashtu siç pritet”, nënvizohet më tej.
Deklarata rikujton se mendimet dhe solidariteti i Mbretit dhe Mbretëreshës kanë qenë dhe mbeten me viktimat e çdo forme abuzimi.
Akuzat e reja lidhen me email-e të publikuara së fundmi në kuadër të dosjeve Epstein. Një shkëmbim elektronik i datës 30 nëntor 2010 sugjeron se Andrew Mountbatten-Windsor i ka përcjellë Epstein-it raporte vizitash për Vietnamin, Singaporin, Hong Kongun dhe Shenzhenin, që lidhen me një udhëtim të tij në Azinë Juglindore në atë periudhë.
Një tjetër email, i dërguar në prag të Krishtlindjeve të vitit 2010, duket se tregon ndarjen e informacionit të cilësuar si “konfidencial” mbi investime në Afganistan. Këto dokumente po shqyrtohen tani nga autoritetet britanike në kuadër të vlerësimit të pretendimeve.
Lini një Përgjigje