FLASH
Shkruar nga Pamfleti
Ghislaine Maxwell, e dënuar për rolin e saj në abuzimet seksuale të kryera nga Jeffrey Epstein, është akuzuar se ka përdorur heshtjen e saj gjatë një seance dëgjimore me dyer të mbyllura në Kongresin amerikan si mjet për të kërkuar butësi politike.
Melanie Stansbury, përfaqësuese demokrate e New Mexico-s dhe anëtare e Komitetit Mbikëqyrës të Dhomës së Përfaqësuesve të SHBA-së, u tha gazetarëve se Maxwell refuzoi të fliste me shpresën se kjo sjellje do t’i transmetohej si mesazh ish-presidentit Donald Trump.
“Është shumë e qartë se ajo e përdori këtë mundësi jo vetëm për të bërë fushatë për mëshirë, por edhe për të dërguar një mesazh të drejtpërdrejtë se heshtja e saj mund të blihet përmes mëshirës,” tha Stansbury.
Sipas saj, mesazhi ishte i drejtuar “drejtpërdrejt vetë Donald Trumpit”.
Donald Trump ka pranuar se e ka njohur Jeffrey Epstein, por ka deklaruar se marrëdhënia mes tyre u ndërpre shumë kohë përpara vdekjes së financierit në burg. Trump ka mohuar vazhdimisht çdo lidhje me krimet e Epstein.
Ndërkohë, gjatë të njëjtës seancë dëgjimore u regjistrua edhe një letër nga familjarë të Virginia Giuffre, akuzueses kryesore në çështjen që lidhej me Andrew Mountbatten-Windsor.
Vëllai dhe kunata e saj, Sky dhe Amanda Roberts, e përshkruajnë Maxwell-in si një “aktore kryesore" në një sistem abuzimi të organizuar.
Në letër citohet Giuffre, e cila e përshkruante Maxwell-in si “më të egër dhe mizore se Epstein”, duke e paraqitur atë si figurën që ushtronte kontrollin kryesor.
"Siç tha Virginia, 'Ghislaine ishte një përbindësh; ajo ishte shpesh më e egër dhe mizore se Epstein. Thënë kështu: Epstein ishte Pinokio, dhe ajo ishte Xhepeto. Ajo ishte personi që kontrollonte."-shprehen ato.
Familjarët theksojnë gjithashtu se dokumentet e fundit të publikuara mbi Epstein tregojnë mospërputhje mes dosjes së Maxwell dhe dëshmive të saj të mëparshme nën betim.
Ghislaine Maxwell u shpall fajtore në vitin 2021 dhe po vuan një dënim prej 20 vitesh burg. Ajo refuzoi të përgjigjej në pyetjet e Kongresit duke u mbështetur në të drejtën për të heshtur sipas Amendamentit të Pestë të Kushtetutës amerikane. Maxwell ka kërkuar përmbysjen e dënimit, duke pretenduar se është dënuar padrejtësisht.
Virginia Giuffre kishte ngritur më herët një padi civile për shpifje kundër Maxwell-it, e cila u zgjidh jashtë gjykate në vitin 2017. Ajo ndërroi jetë në prill të vitit të kaluar.
Lini një Përgjigje